Electric car maker Tesla te chuan elpui turu tak nei tharin chu chu Chinese car maker te an ni.
Chinese car maker BYD, Build Your Dreams te share chu nikum nena khaikhina an third-quarter profit a let hnih aia tama a pun hnuah an share a pung nasa hle a.
Quarterly production ah BYD te hian Tesla te an khum tawh a, khawvel huap pawhin pahnihna an ni mek.
China auto industry te hlawhtlinna nasatzia pholanna ni bawkin thawnchhuah lamah pawh China chuan Japan a khum zui tawh bawk.
China economy-in propety crisis leh hna nei lo tam tak awma harsatna a tawh mek laiin auto industry chu a hmel timawitu langsar a ni thung a.
Chutih rual chuan Beijing leh ram hrang hrangte US leh European ram ni lo te pawh boruak tang tak a awm thung a. A chhan ber pawh khawvel huapin cleaner technology lamah inthlakna a awm mek laiin Western ram te chuan Chinese bungrua hnawl duhna an nei mek a ni.
BYD te hi a tirah chuan battery company a bultan niin a hnuah car siam lamah an insawn zui ta a ni.
Chief executive Wang Chuanfu, China a province rethei ber pawl Wuwei County-a loneitu chhungkuaa piang hausakna chu $18.7 billion lawih a ni tawh a. Wang hi fahrah niin u mipa leh hmeichhia tena an enkawl seilen a ni.
Engineering leh physicial chemistry of mettalurgy a degree a lak hnuah a cousin nen kum 1995 khan Shenzhen-ah BYD an din dun a. Rechargeable battery siam lamah hming chherin chung te chu smartphones, laptops leh electronics hrang hranga hman niin Japanese te siam man to zawk te nena inelber an ni reng thin.
Kum 2022 khan publicly traded company niin a hnu lawkah state-owned car manufacturer tlachhia Qinchuan Automobile Company chu an lei zui a.
Khatih lai khan EVs lam chu a tirte a la nih lai niin Beijing officials te chuan market-a China intah luh dan tur an ngaihven lai a ni a. Kum 2000 tir lam khan renewable energy production lam sorkarin a ngaih pawimawh zual tak avangin subsidy leh tax awl te a kalpui ta vak a ni.
BYD te luh hun a dik hle a, an battery siam te chu EVs te tikaltu ber engine hman atana nasa taka hman a ni zui a.
Kum 2008 khan US billionaire investor Warren Buffett chuan BYD Auto ah 10% a lei a, khatih lai khan ‘global automobile market-ah player lian ber a la ni ang’ tiin a sawi nghe nghe.
Buffett chuan sawi dikin tunah chuan China chuan BYD avangin global EV production lam a thunun der tawh a. Beijing chuan thunun zel tum bawkin nikum June thla khan EVs lama inhnamhnawih te chu $72.3 billion hu vel zet kum li tax awl tur a ti bawk.
Analysts te chuan BYD te chuan an bultanna battery siamah lawmthu an sawi tur a ni an ti a. Battery te chu EV siamna kawnga a man to ber lai niin an elpui ber Tesla te ang chuan tun thlengin battery chu midang siam an la hmang a ni.
“BYD Seal chuan tesla te Chinese-made base Mobel 3 sedan aiin advantage 15% in a nei zawk” tiin UBS report chuan a tarlang bawk a.
BYD entry level EV-Seagull chu $ 11,000 man niin tun hnai lawka Tesla tena Model 3 Sedan an tihchhuah chu $ 36,000 man lawih a ni thung a.
Chinese company te hian EV market piah lamah pawh huhang nei zelin Car hralh hnem berah pawh Germany company Volkswagen te pawh an khum tawh a ni.
BYD vs Tesla
Kum 2011 a television interview a neihnaah BYD leh Chinese competitor te chungchang zawh a nihin Elon Musk chuan a nuih khum a. Khatih lai khan tesla chu publicly trade company naupang tak la niin an car siam hamsak ber Model S an tlangzarh hlimhlawl a ni bawk.
Tunah erawh Musk chuan chhanna dawng tawhin Tesla te chuan September thla khan Chinese-made EVs 74,073 an hralh a, a hma kum aiin 11% velina tlahniam niin China Passenger Car Association te chuan an sawi.
Chutih hun chhung chuan BYD te chuan car 286,903 an hralh ve thung a, chu chu EVs leh petrol-electric hybrid model an hralh lama 43% vel lawihin hma an sawn thung.
China hian an ramah EV tam zawk awm se an duh avangin khawvela car market lian ber an nih hre rengin foreign firm te chu an ramah an siam leh hralh awlsam takin a remti a. A hma zawng chuan China-a car siam turin General Motors leh Toyota te ang chuan local partner an neih a ngai a ni. China sorkar thutlukna siam chu Tesla ten hmang tangkai vatin Tesla te chu China-made EVs thawnchhuak tam ber niin China a EV hralh tam ber an ni zui bawk.
Europe leh UK a car manufacturer te chuan an el pha meuh tawh lo va. Hei vang hian Chinese car maker tena Europe market duh ang thala an run loh nan ruahmanna siam tum nia sawi a ni a.
European Commission chuan EU manufacturer te humhima an awm theih nan tariff tihsan tur a ni em tih te an ngaihtuah mek bawk a. EU President Ursula von der Leyen chuan a hma pawhin China-in dik lo taka thil a tih avangin solar industry in tawrhna nasa tak a nei tawh tiin a sawi.
China company chhuan tawlawl BYD te green car hian Europe a nuai mek a, inflation sang bawk si leh energy cost turu bawk siah China car siam EV te chu hralh a kal em em mek a ni.