China-in a Defence Minister ban

China chuan dan ang thlapin defence minister Li Shangfu chu thla hnih chhung lai mai mipui hmuh theihloha a awm tawh hnu-in a ban ta a ni.
China sorkar thupuangtu China Central Television sawi danin Standing Committee of the National People’s Congress in cabinet member atang leh defence minister atanga Li Shangfu paihna tura an vote hnu-ah President Xi Jingpin chuan he order hi a signed ve tak thu thawhlehni khan an puang a ni. Hetiang tho hian kumin July thla khan China sorkar hian foreign minister Qin Gang chu chin hriatloha a bo rei avangin an lo paih thla tawh bawk.
Qin Gang chu dan ang takin State Council-a member a nihna hlih sak a ni. March thlaa cabinet thar siam a nih khan Li hi defence minister a rawn ni a, mahse August ni 29 atang khan mipui hmaah hmuh tur a awm ngailo a ni.
Thu dawnnain a sawi danin Li chu thu zawhfiah turin September thla khan lak a ni a. Li-a pilbo hma kar reiloteah President Xi Jingpin chuan sipai hotu lu ber ber te nen meeting a neih pui a, politics a rinawmna te, discipline leh sipai chunga party-in thuneihna pumhlum a neih chungchang te an sawiho a ni.
Li hian Xi Jingpin-a thian tha ber a naupan tet atanga a thian leh sipai lama a thian ni ta zel General Zhang Youxia dodaltu nia hriat a ni bawk. Li Shangfu chawlh tir a nih chhan hi hriat nilo mahse senior leader te hian beisei ang an phakloh chuan senior an nih avanga inhriatthiamna leh dawh theihna China-ah a awmlohzia a tilang chiang hle a ni.
Hruaitu lu ber ber te lak bo an ni hi China-ah chuan thil thar a nilo a, thla reilote hnu-a dan bawhchhiatna – corruption hmanga puh zuina te hian a zui nghal vat thin. Tun tuma minister ni lai mek pahnih lak bo an ni pawh hi a zuitu hnaivai tak niin hei hi chu thil thleng khat tak a ni thung.