China in Shadow bank chhui chiang

Chinese official te chuan an rama shadow bank lian ber real estate firm hnena billion tel puktirtu chu a chhuichiang mek.
Zhongzhi Enterprise Group (ZEG) te asset management arm niin an turu ber lai chuan trillion yuan ($139bn) chuang an khawih chevel a ni.
Thuneitute chuan dan kalha chetna a awm ngeia ngaiin an chhui chiang mek a. Hei hi ZEG tena an leiba an rulh theih loh thu an sawi hnuah a ni.
Karkalta khan investor te hnena lehkha an thawnah an leiba chuan $64 billion kai tawhin an asset neih aia an leiba tamna chu $38 billion vel a nih thu an hrilh a.
Thuneitute chuan rinhlelh an nei teuh chungin tute nge an nih chiah leh firm ah engtiang chiaha pawimawh nge an nih an la hre thei lo. He company dintu Xie Zhikun chu kum 2021 khan lungphu chawlin a thi thut tawh bawk a.
ZEG hi China a shadow banking industry lian ber niin shadow banking tih hian pawisa puk tir dan system bank pangngai anga kal lo sawina a ni a. Shadow tih a nihna chhan chu unregulated a nih vang niin traditional banks te angin risk, liquidity leh capital restriction in a tihbuai ve loh a ni.
China shadow banking industryhlut lam hi $3 trillion vel lai anga ngaih niin a bik takin property sector lamah mi tam tak tena an hlawkpui a ni thung a. China a industry thang chak ber ni reng thin kha tunah chuan sum lamah talbuai nasat berna a ni ta thung.
“Kum sawm tam tak chu China hian property bubble a umzui tawh a. Chu bubble siam tur leh China a growth tichak tur chuan capital mamawh a ni a. Mimal investor te atangin a pung sang tak tiamin sum tam tak an la thin a ni. A tirah chuan chu system chu tha takin a kal a, a chhan ber pawh property price a sang a, mintin ten an hlawkpui a ni” tiin Andrew Collier, shadow banking expert, Orient Capital Research chuan a sawi.
Informal lending chu China economy a awmsa a ni a, mahse, shadow banking chu kum 2008 a global financial crisis thlen hnu khan a nasa zual tih a ni bawk.
China economy tlahniam mekah leh real estate sector a crisis thleng mek avangin ZEG buaina hi buaina lian zawk intanna chauh ni tura ngaihna a awm bawk, tiin Andrew Collier chuan a sawi bawk a.
Property developers talbuai mekte chuan Chinese banks pawisa an ba nasa a, bank asset atangin 30% lawih a ni bawk a. Heng chingfel tur chuan hun rei tak a ngai ang, tiin Andrew Coullier chuan a sawi bawk.