China ramah WTA tournament kirleh dawn
Chinese communist sawrkarin an ram hmeichhe tennis player hlui Peng Shuai an bawlzan dan duh loin khawvel hmeichhe tennis thuneitu sang ber Women’s Tennis Association (WTA) chuan China rama tournament an khelh thin zawng zawng a titawp vek a, tunah erawh an thutlukna lo siam tawh ennawnin, kumin atang hian WTA tour an kalpui leh tawh dawn.
Tarlan tawh thin angin, doubles world number one hlui Peng chuan kum 2021 November thla khan an ram social media lamah China vice-premier hlui Zhang Gaoli chuan mipat hmeichhiat hman khawloh kawngah a nawrlui niin a sawi a, a hnu lawkah a thu post hi ‘delete’ leh nghalin, mihring zalenna rahbehna ram China sawrkar chuan a vau ni ngeia ngaih a ni a, WTA lamin hremna an tarchhuak.
Peng Shuai pawh chu vantlang hmuh theih loh turin a bo zui hmiah a, a hnu deuhah hur sualna kawnga hnuhluh luih a nihna chu amah ngeiin rawn phain, Beijing khaw restaurant pakhata midangte nen hlim hmel taka an chawl lai video clip-te chu China sawrkarin enkawl media-in tichhuak bawk mah se tennis ngaih a tha thei chuang lo.
Zhang-a ber chuan puhna a dawn lakah engmah a sawi lo tluan chhuak ta chu a ni a; WTA lam hian puhna chhuichian an ngiat nghal a, Peng pawh a him ngei tih nemnghehna rintlak an neih hma zawng China rama WTA tour kalpui thin pawh tihtawp a nih tur thu an puang zui ve nghal.
WTA hian Chinese thuneitute chu famkim, fair leh langtlang takin Peng chungchang chhuina kalpui ngei turin a nawr chhunzawm a, an duhthusam investigation an kalpui hma chuan an rama tournament reng reng nghah loh an rel.
WTA hian thla 16 chhung China rama tournament nghah an ‘boycott’ bakah Covid hripui avang khan Covid-19 lo chhuahna ramah hian eng tennis tournament mah khelh a la ni leh ta lo vang vang a; WTA phut leh duhdan angin Chinese sawrkar chuan investigation kalpui duh lo mah se tunhnaiah Peng lamhnaite ka atangin Beijing khuaah a chhungte nen chengin, a him tih an hria a, WTA chuan China rama tour kalpui leh a titlu ta a ni.
Men’s Association of Tennis Professionals (ATP) Tour pawhin kumin hian Chengdu, Zhuhai, Shanghai leh Beijing lamah Covid hripui laka inkhuahkhirhna thlahdul a nih ruala tournament kalpui an tum thu an nemnghet ve tawh bawk.
International Tennis Federation (ITF) lam pawhin tunthla chhung hian China rama World Tennis Tour kalpui leh an tum.
China ramah WTA tournament kirleh dawn
