Chona thar hmachhawn duh vanga chhuak Neymar

Chona thar hmachhawn duh vanga chhuak Neymar
Kum khat chhung maia euro maktaduai 150 (£129.2m) tehreng hlawh kai tura ngaih Neymar chuan Saudi Arabia club Al-Hilal tana kum hnih daih contract a ziah chhan sawiin, Europe khawmualpuiah thil tam tak a hlawhchhuak tawh a, hmun danga chona thar hmachhawn a chak vang leh khawilai khawmual-pui pakhat huap emaw chauh tana khel tawk lek ni lo khawvel huap infiammi (global player) nih a duh vang a nih thu a sawi.
A chhuahsan tak Paris St-Germain-a a hlawh lak thin aia a let ruk zeta tam hlawh tawh tur Brazil forward manah Ligue 1 giants hian euro maktaduai 90 (£77.6m) bakah la pung chho leh thei tur an tel awk dawn a, mahse, kum 2017-a world-record fee (£200m)-a leina sum zat erawh kha chu an hmuchhuak zo dawn ta lo niin a lang. Kum 31 mi laite a lo ni ve tawh a, a awm tho mai thei!
Barcelona player player hlui chuan Arab ram a pan chhan sawiin, “Europe-ah thil tam tak hlawhchhuak tawhin, hun hlu leh dangdai vawi duai lo ka paltlang tawh bawk a, tunah chuan khawvel khawi hmun pawh dapchhuak vek player nih ka duhna lantir hun niin ka hria a, chona thar hmachhawn chunga mahni han infiah pawh ka duh pah bawk a, hmun thar hlaka hun remchang ka neih dan pawh inen ka duh tel bawk a ni,” a ti.
Neymar hian a khawsakna tur fak zuiin, “Sport huangah bung thar ziah ka duh a, Saudi Pro League hian tun dinhmunah chakna thahrui namen lo tak neiin, quality player kan tih ang pawh kha an kat nuk tawh a; kum tam tak kaltaa Saudi Arabia rama lo inkhel ve tawh Brazilian player-te chanchin ka hre nual a, hei hi hmun kal chakawm tak a ni tih ka ring thlap a ni,” a ti.
Neymar hi season thar atana PSG coach Luis Enrique ruahmannaah a tel tawh miau loh avangin Saudi a pan tur thu a chian hma karliamta Inrinni league bul an tannaa PSG leh Lorient inhnehtawk tum pawh khan squad-ah telh a ni lo.
Brazilian a chhuah leh tak hnu hian PSG-in tunhma Real Madrid kalphung zuia ‘Galactico’ rual an huikhawm kha an tawpsan dawn ta niin a lang a, nghet lo taka an la kawl der der Kylian Mbappe pawh hi tun nipui thawt laia a chhuak hman lo a nih pawhin nakum nipui insuan hunah chuan club dang thuam a inbel tawh ngei rin ngheh a ni.
Al Hilal chairman Fahad bin Saad chuan an stariker thar Neymar fakin, khawvel huap icon a nih thu leh tlarhma lama dan zawh loh mihring tiin a sawi.
Brazilian hian PSG tan khan game 173 khelin trophy 13 a lakpui a, chu’ng zingah chuan Ligue 1 title panga a tel bakah 2020 Champions League final a thlenpui bawk.
Chutiang taka an player thawhhlawk ni thin kalbo ta chungchang sawiin PSG president leh chief executive ni bawk Nasser Al-Khelaifi chuan, “Khawvela player tha berte zinga mi leh mi mak dangdai tling pha Neymar-te ang han mangtha meuh hi chu a harsa thin.
“Paris St-Germain a lo thlen nite kha ka theihnghilh ngai tawh lo ang a, tunhnai kum ruk liamta chhunga kan club leh project tana a hnathawh pawh hi kan hre reng tawh ang,” tiin a thlahliam.
Neymar-a team thar Al-Hilal hian Mbappe pawh an beisei a, thla hmasa mai khan French champion chuan Saudi club hnenah hian Mbappe biak phalna pawh an pe tawh a, mahse, Real Madrid pan lo tum ngar ngar tawh thin French striker hian Gulf team sawmna a hnar fithla ta rih a, Saudi club-in world-record £259m-a Ligue 1 club an dawrna chuan awmzia a nei zo ta rih lo a ni.
Saudi Arabia ramah hian Europe-a kan player hriat hraw ber ber – Karim Benzema, N’Golo Kante, Jordan Henderson, Ruben Neves, Sadio Mane leh Roberto Firmino-te thlengthla tawhin, kumin January thlaa Manchester United chhuahsana Portugal superstar Cristiano Ronaldo-a’n Al-Nassr a zawm hnu khan sum tam tham lutuk hlawh theihna Saudi Professional League (SPL) club-a insuanluh hi player hming hraw hoin an la intihhmuh kal zel a ni.
Neymar-a new team-mate thar zingah ex-Wolves captain Ruben Neves, Chelsea centre-back hlui Kalidou Koulibaly leh Lazio tana khel thin Sergej Milinkovic-Savic an tel a, he team hi an te lo ang.
July thla mai khan Riyad Mahez pawhin Manchester City kalsanin Al-Ahli a lo zawm fel tawh bawk.