ZPM leader Lalduhoma, chief minister chuan opposition party-te chu chona thianghlima a cho thu sawiin, “Kum nga a ral leh huna ZPM let thla tur khawpin inbuatsaih rawh se; tun atang chuan eng party mahin an kalphung hlui ang kha chuan min hneh tawh lo ang,” a ti. He thu hi nimina ZPM party office hawnnaah a sawi a ni.
Hetiang chona ang hi tunhmaa sawrkarna lo chelhtu ram hruaitute khan an la auchhuahpui ngai lo niin a lang. He chona hian thu tam tak a sawi nghal a, sawrkar hmasa ten ram leh hnam hmasawnna hna an thawh thin aia nasaa thawh an tumzia a lo lang nghal a ni. Chutianga hmasawnna lian tak thawk thei sawrkar chu mipui pawhin sawrkar zui zel turin an duh ngei ngei dawn tihah an innghat nghal tihna a ni bawk. Sawrkarna siam thin party-te kalphung ang ni lova an kal dawn avangin chu chu ‘kalphung thar’ tiin an sawi a. Chona thu chhamah pawh ‘an kalphung hlui ang kha chuan min hneh tawh lo ang’ tih a ni a; chu chuan thil tam tak a sawi nghal bawk awm e.
Kalphung thar hnuaiah hmasawnna thar hmu zel turin mipuiah beiseina an tuh mek a, chu chu a taka tihhlawhtlin tumin sawrkar thar hian tan a khawh na nghal hle a. Ni za chhunga tih hman tura an intiamte pawh an thawk chak hle a, an intiam angin an thawk nghal a, mahse a hlawhtlinna tak tak chu hunina a la rawn hril zel turte pawh a ni thei awm e. Sawrkar hmasa lama kan hmuh thin, ‘NLUP/SEDP kan sem ang kan ti a, kan sem alawm’ tia a hlawhtlinna tak tak a ram pum huap anga hmuh tur awm mumal leh mang lo ang kha ram hmasawnna mutan niin a lang.
Sawrkar thar pawh hian tihtur an sawi malh malh ta hle a, insawi bat hi a pawimawh rualin, a hlawhtlinna hi a pawimawh zawk a. Sawrkar kal tawhte ang bawka tihtur sawi tur hre tak, a taka hlawhtlinna hmel hmuh tur tam leh si lo, phatmarna tur zawng leh ruai ang tho kha an nih chuan, mipui hian beisei tur an nei chau tawh dawn hle tihna a ni.
Tuna Mizoram mamawh ber chu, thenawm state-te dehchhuaha kan innghahna thin zawng zawng thinthlak a, mahnia intodelh ve tura hmalak hi a ni. Hei pawh hi sawrkar thar hian mipuiin chona thianghlima an chonaah ngai tel thei se a duhawm hle a ni.
Chona thianghlim…
