Zirtirtu indaihloh avanga an school chowkider leh mida day meal cook-in zirlai an lakna nia sawi Govt. Lungrang Middle School dinhmu chu sawrkarin a hria a, hma a lak mekna a ni tih sawi a ni.
School Education department hotute sawi danin, Govt. Lungrang Middle School-a zirtirtu indaih lohna chu an hriatpui a, MP inthlan avanga model code of conduct-in a phuar laiin a chet mai theih loh niin an sawi.
Lungrang South VC leh Upper Lungrang VC chuan tunhnai khan Govt. Lungrang Middle School-a zirtirtu nghet awmchhun, Hindi zirtirtu a chawlh avangin zirtirtu nghet awn awm loa, an sikul chawchhum leh chowkider-ten zirlaite an zirtir mai thin tih an sawi a. An ngenna anga zirtirtu pek thuai an nih loh chuan lungawilohna lantira sikul khar thlenga chet an tum tih an sawi a ni.
Hemi chungchangah hian School Education department hotute chuan khawtlang mipuiin an ngen angin bialtu MLA Lalramliana pawhin an harsatna chu department a hriattir thin a. Chutihrualin, Lungrang Middle School ang thoa zirtirtu indaihlohna sikul engemawzat a awm a, sawrkarin a nghet loa zirtirtu a lak thar tur chu heng zirtirtu indaih lo sikul tan hian an dil sak a, Lungrang Middle School tan pawh dilna an thlen tih an sawi. Sawrkarin casual teacher a lak thar hun lo ngaichang tura an ngen thu an sawi a ni.
VC pahnih hian sawrkar hmalakna an ngaihchan tur thu an sawi rualin, Govt Lungrang M/S-ah an lungawina khawp zirtirtu dah belh a nih loh chuan a tul dan anga hma lak chhunzawm an tum tih an sawi a ni.
Chowkider leh cook-in an zirtirna sikul sawrkarin a bawhzui mek lai
