Cincinnati champion
Sinner leh Sabalenka
US Open inbuatsaihna tournament lian Cincinnati Open mipa leh hmeichhe final Thawhtanni zana khelhah world number one Jannik Sinner chu mipa champion niin, hmeichhe lamah No. 3 seed Aryna Sabalenka of Belarus a chak ber ve thung.
Mipa final-ah hian kumin January thla maia Australian Open-a a Grand Slam title hmasaber sualchhuak Italian Sinner hian 7-6(4), 6-2-a Frances Tiafoe hnehin kum kal laia a title pangana a hlawhchhuak a; tunhnai kan hnung chhoah khan a hriselna lamah sawisel tur neuh neuh nei ve reng mah se New York khaw grand slam tournament khelh chhoh turah hian champion tum tana paltlang ngai a nih ngei a rinawm.
Tarlan tak angin, Sinner hi tunhnai thla hnih thum liamta chhung khan khel bawr nain a tibuai ve reng a, tonsil na avangin Paris Olympics-ah pawh ram tan a inlan thei lo a, Cincinnati lamah erawh insawiselna lian nei loin a inlan thei a, Ohio state-a tournament a khelh vawikhatnaah hnehna tluantling a chang zui leh ta a ni.
Flushing Meadows-ah hian defending champion Novak Djokovic leh world number three Carlos Alcaraz-te chu champion thei tura rinkai niin, anni tan pawh Sinner hi namnul mai mai a rem hauh lo ang le!
On-court interview-ah Sinner hian a tan chawlhkar hautak a nih thu leh final match-a a khelh danin a tihhlim thu sawi chungin karleh Thwhtanni atanga khelh tan tawh tur kumina major tournament hnuhnung ber US Open lamah a rilru zawng zawng a sawrbing mek tih a sawi a, hliam leh natna nei loa New York tournament lian atana inpeihchhuah hman chu a tan tihmakmawh a nih thu a tarlang tel.
Final-a chak zo ta lo American Tiafoe khan ATP ranking thar tarchhuah leh turah world number 20 a luah dawn a, ani pawh hian US Open lam hawi zui zelin, Pathianni semi-final match pakhat zawkah Dane Holger Rune a hneh a, Sinner lakah chak zo ta lo mah se New York grand slam atan inrintawkna a neih belh ngei rin a ni.
Kum 23-a upa Italian Sinner kha kum 21 mi ni chunga kum 2008 champion ni thei Britain star Andy Murray hnu lama Cincinnati-a mipa champion naupangber a ni.
January thla Australian Open bakah Sinner hi kumin chhungin Rotterdam, Miami leh Halle khaw final-ah a lo dingchang tawh bawk a ni.
Hmeichhe champ Sabalenka
Kumin Australian Open hnu lama a title hmasaber leh kumin bika WTA 1000 tournament title a lak vawikhatna ni turin Aryna Sabalenka chuan Thawhtanni zan final-ah 6-3, 7-5-in No. 6 seed Jessica Pegula a hneh a, Mason, Ohio-a final khan darkar khat leh minute 15 a awh.
American Pegula khan a hma chawlhkar mai khan Toronto khawpuiah Canadian Open title a kawl lai a humhim zo chiah a, Cincinnati lamah pawh tualchhung mi a nihna zawnah nen champion thei dinhmunah a ding ve a tih loh theih loh a, mahse, match kaw chhung a chakzawn mekna a chhunzawm zo ta lo a ni.
Dar hliam avanga thla hmasa maia Wimbledon khel thei lo kum 26-a upa Sabalenka hian a trophy dawn chu a tan trophy hlu tak a nih thu sawiin, hliamin a tihbuai hnu leh intihnat zui hlauhawm ru reng chunga a hlawhtlinna chu a hlut dan a sang bik niin a sawi.
WTA ranking thar tarchhuah leh turah Belarusian Sabalenka hian Coco Gauff hmakhalhin No. 2 hmun a luah chho dawn.
Thawhtanni final thleng tur khan Sabalenka hian quarter-final lamah 6-3, 6-2-in No. 10 seed Liudmila Samsonova of Russia a hneh a, semi lamah rinkai zawk No. 1 seed Iga Swiatek of Poland chu 6-3, 6-3-in a barakhaih zui leh bawk.
Belarusian Sabalenka tan tun kha a career-a title 15 a lakna ni tawhin, WTA 1,000 level bikah chuan vawiruk a champion-na chiah a ni thung.
Cincinnati champion Sinner leh Sabalenka
