City an chak ve leh ta

November 28, Inrinni zan khan English Premier League khelh chhunzawm a ni a, EPL leh Champions League-a tlawm zawn Manchester City in hnehna changin kawng dikah an kir. City an chak lai hian Tottenham Hotspurs erawh chu Fulham hneh lovin an tlawm ve thung.
City chakpuitu Foden
Team lian Manchester City hi inrinni hmasa zan khan Newcastle United hneh lovin an tlawm a. Thawhleh zan khan champions League khel zui leh nghalin Etihad Stadium-a an mikhual Bayer Leverkusen hneh lovin an tlawm zui leh. Vawi hnih an tlawm zawn vanga an boruak a hniam hman viau laiin Inrinni zan khan an mikhual Leeds United lakah harsa takin hnehna an chang thei hram. Leeds laka City chakpuitu hi tun tum chu Haaland ni lovin Phil Foden a ni.
City hian an mualah bul an tan tha tak zet a, inkhel tan atanga minute khat em pawh a tlin hmain goal an thun nghal der. Fuh taka an khingpuite an nawr tlang hnuin Matheus Nunes siam tha tak chu Phil Foden chuan goal ah a chantir a, hmahruaina goal a thun nghal.
Hma takah goal an thun vangin City an phur a, an mikhualte an nawr zui nasa hle. Na taka an nawr rah an seng a, goal pawh an thun zui leh thuai. Minute 25-naah defender Josko Gvardiol chuan buai nuaih nuaih kar atangin a tauh goal a, an goal hnihna a thun. Minute 25 chhunga goal hnih an thun hman vangin City hi an mualah nuamsa takin an chak ngei a rinawm hman hle.
Goal hnih chhuah zawnin, chawlhlawk hmain goal thun thei lo mah se chawlhlawk hnu lamah Leeds United an khel tha viau thung a, goal hnih an thun zawn. Second half tan atanga minute lina lekah Dominic Calvert-Lewin chuan goal thunin an si phurh a sut then. Calvert-Lewin goal Leeds an phur thar hluai a, goal dang pawh an thun belh har lo. Minute 68-naah Lukas Nmecha chuan an goal hnihna thunin an si phurh a sut zo va, mak tak maiin City a nih rual.
Goal hnih an chhuah zawn vangin City an hawihai viau a, an mualah an chak zawh loh mai a hlauhthawnawm viau bawk. Goal thun belh tumin an innawr tawn nasa viau a, hun pangngaiah goal thun belh thei an awm lo. Hun pangngaiah goal a luh belh theih loh hnuin goal hmahruai thuntu Phil Foden chuan minute 90+1-ah goal pawimawh tak a thun a, City in hma an hruai nawn leh. Foden goal hnihna hi hun tawp thlengin an humhim thei hram a, City in an mualah harsa taka hnehna chang hramin, an mualah point thum hlu tak an hmu.
Phil Foden goal hnih thun hmanga chak City hian khelh 13 atangin point 25 an hmu a, pahnihnaah an inhlangkai. An chung chiaha awm Chelsea chu point hnihin an lehpel a, hmahruaitu Arsenal nen an inkarah point li a tla zep mek. Pathianni zan khan Chelsea leh Arsenal an inkhel a, an result a zirin City dinhmun a danglam thei dawn thung.
Spurs an tlawm leh tawh
An mualah Manchester City an chak laiin London club lian Tottenham a tlawm ve thung. Spurs hi Arsenal lakah 3-0 ngawta an tlawm hnuin UCL-a an mikhual Paris St-Germain lakah 5-3 ngawtin an tlawm zui leh a. Insiamthat tum viau mah se an mikhual Fulham hneh lovin an tlawm zui leh a, ni sarih chhung lekin vawi thum ngawt an tlawm a, chawlhkar duhawm lo tak an hmang.
Tottenham muala lenglut Fulham hian bul an tan tha viau a, minute ruk chhung lekin goal hnih an thun hman. Fulham tan hian Kenny Tete chuan inkhel tan atanga minute lina lekah hmahruaina goal a thun nghal. Hma takah goal an thun vangin an phur viau a, ngam taka an khingpuite nawr zuiin an hlawhtling leh thuai. Goal hmahruai an thun atanga minute hnih hnu lekah Harry Wilson chuan an goal hnihna a thun belh zui leh zat. Minute ruk chhung leka goal hnih an thun hmang hian 2-0 a hmahruai chungin chawlhlawk an hmang.
Chawlhlawk hnu lamah tlawm pumpelh tumin Spurs in tan an khawh zui nasa hle. Mohammed Kudus chuan minute 59-naah goal thunin an si phurh sut then mah se goal dang an thun belh thei lova, an tlawm ta a ni.