City lakah United an

Pathianni zan khan English Premier League-ah inkhel ngaihven hlawh tak a awm a. Derby boruak lian Manchester derby-ah Manchester United chu Old Trafford-a an mikhual Manchester City lakah an zawr a, si thum faiin an tlawm. Pathianni zana inkhel dangah team liam Liverpool chuan an mikhual Nottingham Forrest chu si thum faiin an sawp ve bawk.
Thiam theihnghilh lo Haaland
Manchester khuaa lian zawk leh chungnung zawk nih inchuh reng renga hmanhlel United leh City inkhel hi eng level-ah mah a boruak a hniam ngai lova, ngaihven a hlawh em em reng. Pathianni zanah Old Trafford-a an inhmachhawn pawh hi a boruak a lian viau a, beisei anga hmasawn chak lo United tan hautak leh pawimawh tak a ni. Old Trafford-ah ngei si thum faia an chak theih nan City forward Erling Haaland a thawhhlawk viau a, goal hnih a thun bakah assist a nei bawk. Season kal mekah beisei anga goal thun pup pup lo Haaland hian a thiam thil a la theih-nghilh lo tih an hmelma United lakah a lantir.
United leh City hi inkhel tir lamah an inhnehtawk a, goal hlauhawm an siam tam thei lo ve ve. City in ball an chang hnem zawk a, United nawr let a hlauhawm thin thung. Minute 26-naah United forward Rasmus Hojlund chuan tum lo takin box chhungah Rodrigo a pawttlu a, penalty a chawi. He penalty hi Erling Haaland chuan si nghak Onana rin lohna lamah chiang zetin a pet goal a, hmahruaina goal a thun. He goal hi inkhel tidanglamtu a ni a, City in inkhel an thunun zui ta viau a, City in an kat kual a ni ta deuh ber. Chawlhlawk hmain Haaland chuan goal thun belh theihna hun tha zet mai a nei a, si nghak Onana chuan pui zetin a lo dansak thung a, a team a chhanhim. United tan hian Scott McTominay chuan goal a thun teuh viau a, a pet tha zet mai chu City si nghak Ederson-a’na lo dang hman hlauh.
Chawlhlawk hmain goal thun belh thei lo mah se chawlhlawk hnu lamah City goal an thun belh leh thuai. Minute 49-na lekah Bernardo Silva siamsak tha tak chu Erling Haaland chuan chiang zetin a tauh goal a, an hmahruaina a ti zau. Si hniha hma an hruai hnuin City an khel tha leh zual a, inringtawk leh nuam ti takin United an hmachhawn zui a, ball an chang tam fal hle. City an khelh that telh telh laiin United khelin awmzia a nei hlei thei meuh lo thung.
United si nghak Andre Onana-a’n Haaland hattrick siam tur a dansak hnuin hun tawp dawn hnaihah Haaland siam tha zet chu Phil Foden chuan minute 80-naah awlsam takin a pet goal a, an goal thumna a thun. Si thum ngawt an phurh hnuin Marcus Rashford chuan goal thun theihna hun tha nei mah se a chhawr tangkai zo lova, hun tawp thlengin goal an thun theih loh phah. Goal dang luh belh lovin inkhel a tawp a, City chuan si thum faiin hnehna an chang a, point thum hlutak an hmu.
An elpui lian United lakah an chak leh tak vangin City hian vawi 10 khel khelin point 24 an hmu a, pathumnaah an awm mek. An chung chiaha awm Arsenal nen an point hmu zat a inang a. Table chung ber luahtu Tottenham nen an inkar ah point hnih a tla zep mek bawk. Hetihlai hian United hian khelh 10 atangin point 15 an hmu ve mek thung a, pariat naah an mek a ni.
Liverpool in Diaz
an thlawp
Pathianni zana inkhel dangah Liverpool chuan Anfield-a an mikhual Nottingham For-rest chu si thum faiin an sawp. An mualah awlsam taka an chak tum hian Liverpool player te chuan misualin a pa an rukbosak vanga harsatna tawk mek Luis Diaz an thlawpna an lantir hlawm.
Liverpool tan hian Diogo Jota chuan minute 31-naah Szoboszlai siamsak atangin hmahruaina goal a thun. Hmahruaina goal an thun atanga minute li hnu lekah Darwin Núñez chuan an goal hnihna a thun zui ve leh zat a. Si hnih faia hmahruai chungin chawlhlawk an hmang. Chawlhlawk hnu lamah Liverpool an khel tha chhunzawm a, Forrest si nghak Turner chetsual vangin Mohamed Salah chuan minute 77-naah awlsam takin a pet goal a, an goal thumna a thun.
An mualah si thum faia an chak tum hian Liverpool player ten an khelhpui Luis Diaz an thlawpna an tilang a. Goal hmahruai thuntu Jota chuan Diaz jersey a pho lang. An goal hnihna thuntu Nunez pawhin a chetzia in Diaz a thlawpna a tilang ve bawk. Liverpool winger Luis Diaz-a nu leh pate hi Colombia-a misual pawlin a rukbo a. A nu chhanchhuah ni tawh mah se a pa awmna chin erawh tun thlengin hriat a la ni lo. A pa an rukbo vangin Nottingham Forrest hmachawn tur team atangin Diaz hi a inpuchhuak a, boruak rit tak hnuaiah an ram a pan. Diaz-a pa hi chhanchhuah tumin hmalak mek a ni a, hmasawna a la awm tlem hle thung.