City leh Chelsea dinhmun a chhia

March 11, Nilai zan khan UEFA Champions League last 16 khelh chhunzawm a ni a, English club lian Manchester City leh Chelsea te chu mikhual an nihna hmunah si thum phurin an tlawm ve ve. Khingpui hautak lakah si thum ve ve an phurh vangin City leh Chelsea dinhmun a chhe hle a, tlak an hnaih viau a ngaih a ni.
City ngam loh Valverde
English club lian Manchester City chu Champions League-a team hlawhtling ber Real Madrid hmachhawn turin Santiago Bernabeu-ah an leng lut. Mikhual an nihna hmunah beisei an phak lo viau a si thum ngawt an phur haw. City in an ngam loh chu goal thuna lungthu kim Federico Valverde a ni.
An player pawimawh Kylian Mbappe leh Jude Bellingham tel lova inlan Real Madrid hian City lakah bul an tan tha viau a, inkhel tir lamah goal an thun teuh hle. City pawhin ngam takin an nawr let a, hlauhawm an siam ve bawk. City in hlauhawm siam bawk mah se Real Madrid in fuh zetin an nawr let thut a, Federico Valverde chuan fuh zetin a khalh tlang a, si nghak Donnarrumma a bul tlang hnuin goal ruakah awlsam takin a pet goal a, minute 20-naah hmahruaina goal a thun. Hmahruaina goal an thun vangin Los Blancos hi an phur hle.
Hmahruaina goal an thun hnuin Real Madrid an khel tha chhunzawm a, goal hmahruai thuntu Valverde chuan minute 27-naah fuh zetin a pet goal nawn leh a, an hmahruaina a tizau. Goal hnih thun tawh Valverde hian chawlhlawk dawn hnaih minute 42-naah chiang zetin a pet goal zui leh a, goal thum thunin lungthu a kim ta chiah a. A goal thum thun hmang hian 3-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, City in an si phurh sut tumin tan an khawh zui nasa hle. Goal thun mamawh viau mah se second half tirteah goal an chhuah belh teuh hle a, vanneihthlak takin an him thei hlauh. Hemi hnu lawk hian City in goal thun theihna remchang zet mai an nei a, O’Reilly chuan uiawm zetin a hun tha neih a hlah. City in an hun tha neih an hlah zawn hnuin Real Madrid in fuh zetin an nawr tlang a, Vinicius Junior chuan penalty a hlawhchhuak. A penalty hlawhchhuah hi Vinicius Junior hian pet mah se a hlah tlat thung a, an hmahruaina an tizau thei bik lo. Inkhel hmuhnawm tak chu goal lut awm belh lovin a tawp a, Real Madrid chuan an mikhual Manchester City chu 3-0 ngawtin an lo sawp a, quarter-final an hnaih kuarh.
Mimualah chiang takin tlawm mah se Etihad Stadium-ah an inhmachhawn zui leh dawn a. Pep Guardiola enkawl City hian inlehthalna lian thlentir ngei tumin tan an khawh ang a, inkhel hmuhnawm takah kan hmuh leh ngei a beiseiawm hle.
PSG 5-3 Chelsea
Champion lai Paris St-Germain chuan FIFA Club World Cup final-a an ngam loh Chelsea chu Parc de Princes-ah an mikhual a, 5-2 ngawtin an mualah an chak. Si thum ngawta hma an hruai tawh vangin PSG hi dinhmun tha takah an ding a, quarter-final an hnaih leh zual sauh.
PSG hian an mikhual Chelsea lakah bul an tan tha viau a, inkhel tan atanga minute 10-na lekah Bradley Barcola chuan hmahruaina goal a thun nghal. Hma takah goal thun bawk mah se an him rei thei bik lo. Chelsea tan Malo Gusto chuan minute 28-naah goal thunin an si phurh a sut. 1-1 a nih hnuin PSG tan Ousmane Dembélé chuan minute- 40-naah an goal hnihna a thun zui leh a, 2-1 a hmahruai chungin chawlhlawk an hmang.
Chawlhlawk hnu lamah Chelsea in goal an thun hmasa a, Enzo Fernández chuan minute 57-naah goal thunin an si phurh a sut. 2-2 a nih hnuin PSG an khel tha ta viau thung a, a tawp khar thain goal thum ngawt an thun zawn. PSG tan hian midfielder khel tha tluang tak Vitinhachuan minute 74-naah hma an hruai nawn lehna goal a thun.
Hma an hruai nawn leh hnuin PSG an chungnung zui zel a, hun tawp dawn hnaih minute 86-naah Khvicha Kvaratskhelia chuan an goal lina thunin an hmahruaina a tizau a. An goal lina thuntu Kvaratskhelia hian hun pek belh minute 90’+4-ah an goal ngana a thun zui leh a, phu takin an chak zui ta a ni.