Civil Hospital Aizawl-in Kayakalp Award 2025-2026-a pakhatna lawmman an dawn chu Nilaini khan an lawm.
‘Kayakalp’ hi Sanskrit tawng a ni a, ‘transformation /rejuvenation’ tihna a ni. Sawrkar damdawi in fai tehna a ni a, Swachh Bharat Mission hnuaia Ministry of Health and Family Welfare buatsaih a ni. Civil Hospital Aizawl hian ‘District Hospital fai ber’ lawmman an dawng a, kum 2015 khan an lo dawng tawh bawk. Kayakalp Award dawng turin damdawi in hian internal assessment an tih hnuah peer assessment leh external assessment an paltlang a ngai a ni.
Hmanpuitu Health & Family Welfare minister Lalrinpuii chuan, Civil Hospital Aizawl chu sawrkara doctor thiam ber ber leh hmanraw changkang leh chhuak thar tinrenga thuam a nih avangin mipuiin an pan nasa a, thawktute an hah hle chunga hospital enkawl faina lawmman an dawng thei chu chhuanawm a tih thu a sawi a. India Danpuiin mipui dikna chanvo a pek zingah ‘Right to Health’ a tel avangin sawrkar hnathawk, a bikin damdawi ina thawktuten zah sak a, damlo dawnsawn kawngah theihtawp chhuah a ngai tih a sawi.
MUHCS hman tan dawn khan thawktu indaihloh phuhrukna turin Civil Hospital Aizawl chu nurse 300, multitasking staff 100, paramedical staff 47 leh medical officer engemawzatin thuam chak a ni tih a sawi a. Kal thlak bultanna atana sum mamawh belh nuai 48 vel Finance department dil mek a ni a; lung enna – cath lab thar leh MRI khawl thar bun niin, PSA (Pressure Swing Adsorption) Oxygen Plant cheng nuai 80 man bun a ni tawh a, Trauma Centre building luahluh ni tawhin a chunzawmna tur CSR atangin hmuh an inbeisei tih a sawi.
Hospital hmanrua hrang hrangin power supply an mamawh reng avangin Power & Electricity department hnenah power line tichak tura dil a nih hnuah Finance deparmtent-in hemi atana senso cheng nuai 109.43 a pawm tawh a, Trauma Centre atan diesel generator thar buaipui mek a ni tih a sawi bawk.
“Mipuiin damdawi in fai leh thianghlima inentir an phu a, damdawi in tha leh tha lo an tehna tam tak pawh faina leh thianghlimnaah a innghah avangin thawktu zawng zawngte faina leh thianghlimna kawngah hma la chhunzawm zel ang,” Lalrinpuii hian a ti a. Damlo damdawi in pantute chu hawihhawm taka lo dawngsawng a, nui hmel pu tam turin a fuih.
Civil Hospital Aizawl-in fai lawmman lak a lawm
