Ram nawm leh nawm loh tehna atana pawimawh tak pakhat chu hriselna lam a inenkawlna that leh that loh hi a ni. Hriselna lam a hmasawn hi hmasawnna kawng a thil pawimawh lehzual bik a ni a, eng ang pawhin thil dangah hma sawn mah ila, hriselna lamah hma kan sawn loh chuan kan hmasawnna a khingbai tho tho ang.
India ramah hian damdawi in quality tehna pawimawh leh hautak zet mai a awm a, chu chu NQAS (National Quality Assurance Standards) tih a ni, kum 2025 chhung khan Mizoramah NQAS tehna paltlang, damdawi in quality tha bik a chhiar 48 zet mai kan nei a, chung zingah chuan Civil Hospital Aizawl a tel a, NQAS paltlang tur hian tehfung khirkhan tak tak 5000 chuang paltlang a ngai a, NQAS certify hospital nih hi thil namai lo tak a ni.
NQAS mai bakah hian damdawi in felfai lawmman Kayakalp Award dawng hi kum 2025 chhung khan Mizoramah sawrkar damdawi in leh HWC 193 awmin, Civil Hospital Aizawl hi chung zingah chuan a tel ve leh bawk, he lawmman hi Swachh Bharat Mission hnuaia Ministry of Health and Family Welfare buatsaih niin, lawmman dawng tur hian damdawi in te hian Internal Assessment an tih hnuah Peer Assessment leh External Assessment te an paltlang a ngai a ni.
Heng a chung a kan sawi lawmman hlu tak tak pahnih dawng tur hian a mawhphurhtute chuan theih tawp chhuahin, an hahpui hle ang tih a hriat a, hriselna kawng a kan hmasawnna tur hi kan ram hruaitu, a bik takin kan Health Minister leh department thawktute’n mut mawh hnar mawhah nei lo se tun dinhmun hi kan thleng kher lo ang.
Mizoram pum a NQAS paltlang leh Kalyakalp lawmman dawng damdawiin zawng zawng-te hmasawn dan sawi a chakawm rualin, tunah chuan Civil Hospital Aizawl bik hi han thlur bing ta ila, heta tang ringawt pawh hian tun a kan sawrkar kal mekin mipui mimir hriselna a ngaih pawimawh zia a lang chiang hle awm e.
Civil Hospital Aizawl-in lawmman a dawn phenah hian thawhrimna leh inpekna mai bakah, hmanraw tha lei a ngai a, thawktu tha neih tam a ngai bawk, hmanraw tha leh thawktu tha hi sum tam tak sen ngaihna thil a nih avangin sawrkarin hmasawnna tak tak a tuipui loh chuan awlsam tak a neih theih a ni lo.
Tuna Mizoram sawrkar hian hriselna lama inenkawlna hi mut mawh hnar mawhah an nei a ni tih hi hai rual a ni lo a, Civil Hospital Aizawl bikah MUHCS bul tan a nih dawn khan thawktu indaihloh phuhrukna turin Aizawl Civil Hospital chu nurse 300, multitasking staff 100, paramedical staff 47 leh medical officer engemaw zatin thuam belh an ni a, tun hnaiah Kal thlakna – Kidney Transplant bul tanna tur a sum mamawh belh cheng nuai 48 vel pawh Finance Department lamah dil mek niin; lung lam enna – Cath Lab thar leh MRI khawl thar bun a ni a, PSA (Pressure Swing Adsorption) Oxygen Plant nuai 80 man pawh bun a ni tawh bawk, Trauma Centre Building luah luh tawh niin a chung zawmna tur CSR atanga beisei a nih thu thuneitute’n tun hnaiah an sawi bawk. Hospital hmanrua khawl hrang hrang ten electric an mamawh reng avangin P&E Department hnenah Power Line ti chak tura dil a nih hnuah Finance Deparmtent in hemi atana senso cheng nuai 109.43 pawh a pawm tawh a, mipuite hriselna ngaih pawimawh kawnga kan sawrkar leh minister-te tangrual ri ngaihthlak hi mipui tan a thlamuanthlak tak zet a ni. Trauma Centre atan Diesel Generator thar buaipui mek a nih thu thuneitute hnen atangin hriat a ni lehzel bawk.
Tun 2025-2026 chhung hian Civil Hospital Aizawl hmasawnna hi a zuanin a zuang a, kum 2025-2026 chhung a hmasawnna (achievement) an neihte i han tarlang teh ang:-
RADIO DIAGNOSIS & IMAGING (RD&I) :
i) June 2025-ah MRI khawl bun a ni.
ii) X-Ray khawl thar Horizon 630mA chu January ni 21-ah bun fel a ni a, Printer thar a keng tel.
iii) June 2026 khan Trauma Centre-ah X-Ray khawl thar 630mA bakah Ultrasound khawl thar leh a ken tel thil dang te nen bun fel a ni.
CARDIOLOGY DEPARTMENT
i) Cardiac Catherisation Cath Lab thar chu January ni 26 ah hman tan a ni. A tangkaina te chu :-
a) Lung tihrawl chawmtu thisen zam block leh block loh enna a ni a. A lo block chuan Sten vuah thin a ni.
b) Pacemaker (Lungphu battery) a vuah theih.
c) Lungpawp thenkhat a thawm theih.
ii) Damlo zai tawh zat :
a) Coronary angiography – 108
b) Angioplasty/Stenting – 68
c) Permanent Pacemaker implantation – 44
d) Temporary Pacemaker – 12
e) Intravascular Ultrasound (IVUS) – 3
f) Pericardiocentesis – 1
BMW (BIO MEDICAL WASTE) STORE ROOM:
Bio Medical Waste hi damdawi ina damlote enkawlna ningnawi, bawlhhlawh dang zinga paih chi si lo te an ni ber a. Heng bawlhhlawh te fun that a, a paihna hmuna paih an nih hma a lo dah lai lawkna tur hmun BMW Storage Room hi Trauma Centre hnungah Mizoram Health Systems Strengthening Project (MHSSP) sum hmanga siam thar neih a ni a.
Authorization leh Consent to Operate Certifcate pawh kum 10 chhung atan Mizoram Pollution Control Board chuan a pe bawk.
EFFLUENT TREATMENT PLANT (ETP) :
ETP hi damlote atanga thisen/tuiril chhuak midangte tan a hlauhawm thei tihthianghlimna khawl a ni a. He Khawlah hian OT/Lab/Ward etc atanga tuiril chhuak te kal khawmin, damdawi nena sawngbawl a nih hnuah vantlang tuiluankawr a paih zui ngam a ni a, pangpar tui atan te pawh a hman tlak a sawi a ni.
EMERGENCY DEPARTMENT:
i) Emergency dept. hi January ni 30,2026 ah Trauma Centre building tharah an insawn lut.
ii) Tunah chuan Emergency Dept. hi Emergency Laboratory, X-Ray khawl, Ultrasound te an nei tawh.
MEDICAL RECORD DEPARTMENT:
i) Medical Record Department a damlote Medical Records chu Digitalized a ni a. Hei hi MUHCS atan te, DNB Student leh Research Scholars te tan a tangkaiin, awlsam takin a Soft Copy pawh a lak chhuah theih a ni.
ii) Online OPD leh Cash counter siam belh a nih avangin damlo intlar thui lutuk pawh a ziaawm phah.
OBST. & GYNAE DEPARTMENT :
i) Moduler OT tunah hian siam zawh thawkhat a ni.
ii) Maternity HDU thar siam zawh tawh a ni.
iii) QA hnuaiah Laqshya tha takin an kal pui.
PAEDIATRIC DEPARTMENT:
i) Neonatologist an neih tak avangin SNCU chu tha takin kalpui theih a ni.
ii) Paediatric Critical Care lamah Super Specialist an neih tak avangin Paediatric HDU leh ICU an nei tawh a ni.
iii) QA hnuaiah Musqan tha takin kal pui a ni.
MICROBIOLOGY DEPARTMENT :
Trunat Machine, Hepatitist Viral Load en theihna an nei thar a, man chawi ngai lovin damlote en theih a ni.
BIOCHEMISTRY :
Heng khawl te hi neih thar a ni:
i) Merilyzer Gluquant AIC
ii) Maglumi X3
iii) Merilyzer Autoquant 800m
iv) Immuno Chemistry an ti thei tawh a, Sample rang zawkin an pe chhuak thei tawh a ni.
Phai lam doctor-te thiamna hi kan Mizoram doctor-te thiamna hian a phak vek a, an harsatna ber thin chu khawl/hmanraw tha an nei lo thin kha a ni, mipui mimir hriselna tur a sawrkar damdawi in thuam chak kha kan tun hma sawrkar khan a tuipui ve lo fo a, miharsa zawk-te’n kan tuar fo a ni.
Civil Hospital Aizawl hmasawnna kan hmuh hian mipuite kan thla a muang a, sawrkarah beiseina sang tak kan nei a ni. Tunah chuan doctor-te thiamna chawk phur a, mipuite hriselna tur mut mawh hnar mawh a neitu sawrkar kan lo nei ta tih a lang reng mai. Tun a kan dinhmun leh thlen chin hi a tawpna ni lo se, hmasawn lehzual tur a min tichaktu lo ni se a duhawm hle. Mizoram mipuiin tun aiin phai lam doctor kan mamawhna-te zawi zawiin a tlahniam hret hret turah ngai ila, state pawn a kan inenkawlna sum luang ral thin hi a uiawm em em a, Mizoramah Medical Tourist a tam thei ang ber rawn kal se kan ram leilung mawina khawvel hriata puan chhuahna remchang a lo nih bakah ram leilung fate’n hlawkna kan tel dawn a ni.
Medical lama thawkte hi mihring ve bawk an nih avangin tihsual an nei ve chawk thin, an hna hi nunna leh thihna inkar thil a nih avangin an pawimawh em em a, kan sawrkar, health minister leh medical lam a thawktute’n Mizoram mipuite rawng tha taka an bawl zel theih nan i tawngtaisak fo ang u.