RK Dawla
Mb 9366095658
1. Khuangchawi thla kan thleng leh ta reng mai. Chutih laiin Mizoram hmun hrang hrangah rawthing tâm vangin zuva-in thlai a seh tan mêk a. Kumtir lamah khan kan sawi lâwk tawh a, chhiatna namên lo tâwk thei reng kan ni tiin. Ramhnuaia rawthing rah tlan tur a awm mumal tawh loh chiah khan, kan huan/lo thlaite an rawn khawih kha a rinawm viau rêng a ni. Sawrkar pawhin sazu hraia Mass poisoning kalpui ngawt lo deuh hian, zuva ei chhiatsakte zangnadawmna tur ruahmanna mumal tak siam vat sela a tha khawp mai. Kuthnathawktute ngaihsak leh ngaih pawimawh hi kan ram leh hnam damna tur a ni. Ram mipui zinga a tam ber an ni a, vote share ang zawng pawhin a thawhhlawk ber an ni a. Anni ngaih pawimawh loh hi sawrkar tân thil tihchi loh tak a ni ngei ang. A ram pum angin kan budget tam tak luan ralna sawrkar hnathawk zinga chi khat, CSS teacher kan buaipui luih luih a. A àwm. Hei aia la àwm leh zual chu khuarel chhiatna vanga farmer rilru nâ thawidam hi kan ram tân a àwm ber!
2. Thlasik rim a nam feih feih a. Leilung khuhtu hnim than a thu tan a. Huan kumhlun siamte tân, hnim sàm thiam a ngai tawh viau. Lei hnaih lutuk leh lei langa sàm chi a ni tawh lova, leilung khuh turin hnim kan mamawh êm êm zawk a. Hei vang hian hnim sâng zualpui chauh chhawk a fuh tawh a. Leilung kawlh vul maia huan kumhlun hnim kan sawisa thin hi englai mahin a fuh lova, thlasik lai phei chuan a fuh lo lehzual a ni. Tin, sawrkar laipuiin PM KUSUM scheme a kalpui mêk bawk a. Gravity-a tui la thei lo tân huan mawng lama kawr tui pump theihna tur a ni a. Subsidy a tam avangin a mamawhtu tak tak tân chuan chhenfâkawm tham tak a ni ngei ang. thal laia leilung khawro lutuk hi hmim tirêmtu, thlai tâna tawrhna thlentu leh lei tichhe zualtu an ni a. Chuvangin, thlai bul chauh ni lovin, a khât tâwka a mual muala huan leilung phuh huh a tangkai êm êm. Leilung khawro lutuk hian lei siamthatu ber lei hrik chi hrang hrang a tihlum a, a tihhlum bâkte than leh inthlahpun a tisukuk a. Tichuan, leia hnathawktu ber an chawl ta thuap a, lei a chhia-in, a khal châr a. Lei khal châr sak lutuk kha a kum leh monsoon ruah mal lian takin a chhu leh hrep a. Lei a da chak êm êm thin. Lei dà chu thlaiah a lo lang a, thlai hrisel lo, rah tam thei lo, rah rual lo leh puitling tha thei lo chenin a ngawhng chhuak ta thin.
3. Kan sik leh sa lo danglam zelah hian, khua a ro na telh telh a. Ruahtui a tlâk lahin mumal lovin a tla tlawrh tlawrh a. Heng zawng zawng laka kan thlai leh an tona leilung venghim tur chuan, thal laia leilung hnâwnna vawng tura hnim zuah leh leilung tuipêk te, fur tuihawk hnathawh tinêp tura leilung sawisak te – heng hi an pawimawhzia kan hre chho telh telh dawn. Tin, a ram pum angin sawhthing kan buaipui a, leilung vên that loh leh technology mumal lovah chuan, chemcial pesticides kan hmang lo thei lova. Chutianga pesticides hmanna sawhthing chu a leitu lamin an iai thin bawk si a. Chuvangin, Mizo nawlpuiin sawhthing kan buaipui dan sustainable lo zet hi kan chinfel a ngai dawn. Organic hmanga sawhthing leh thlai chinte hi khawvel khawi ram mahin an iai ngai lova, a hralhna a hnawng tak tak thei lo. Sawhthing hmanga hausak thut tum lovin, sawhthing hmangin sustainable agriculture system kan duan a ngai zawk a ni. Zofate kan harh a ngai a, hlawk phut tum lovin tlo-na kan zawn zel a tul zawk e, kan tunlai khawvelah chuan.