RK Dawla
Mb 9366095658
1. July thla tâwp lam kan lo hnaih ta a. Boruak leh leilunga hnâwng tam lai kan thleng chho mêk a. Khua a lum bawk avangin thlai leh hnim than a chakin, thlai tâna tangkai leh hnawksak hrik chi hrang hrangte pawh an inthlahpung chak mêk a. Tin, tui tâi pût vangin lei thaw deuhah chuan lei chunglanga leitha tam tak a pût bo (leech) tam thin bawk. Leihâng (soil organic matter) ngah lo terrace lei leh tlangchâr leiah phei chuan, thlai chaw pût-bo hi a tam duh zual thin. Hnim leh phûl thenkhat an pâr tân a. Hei vang hian plantation tam ber chu hnim sàm hunlai a ni mêk bawk. Phûl lam chite hi a chi (seeds) atang leh a kuang (stolon) atanga inthlahpung an ni thin a. A chi atang hian hmun hla tak takah pawh a a darh thei a, hei vang hian a pâr tantirh lai, a chi chang insiam hma chiaha sàm kha a pung lutuk vêng turin a pawimawh êm êm.
2. Tin, mi tam takin Hlo tûr hman kan uar êm êm. Mahni compound zîm tê pawh hnim pawt peih lovin hlo tûrin kan kâp kher thin. Hei hi kan ram awihtlan leilung leh a chhunga inrelbawl chi tinrêng tân a pawi êm êm. Hnimte hi leilung tuamdamtu, nutrient cycling awmchaktirtu leh an tawih pawha thlai mamawh chaw petu an ni a. Tûr hmanga kan hrai hian nutrient cycling awmtirtu lei hrik chi hrang hrangte pawh kan hrai tel a. A bikin, systemic herbicide-ho phei chuan hnim kha a zung atangin an ei hlum a. Lei kalral tur chelhtu hnim zung awm ta lo chu lei a kalral nasa êm êm thin, awihpang ruahtui tamah chuan. Vaiho hian thlasika leilet khuh dam turin badam, chana etc an ching thin a. Mizoram hmun thenkhatah pawh hian April thlaah Betê/badam an tuh a. Vawikhat thlawhfai bâk a ngai tawh lova. Bete/badam khan hnim a dîp ral titih mai thin. Hnim a hnawksak viau chhan chu soil ecosystem dik lo, lei chhia kan neih vang a ni a. Hei zawk hi kan problem chu a ni. Kan problem zâwk tak ngaihtuah lova a lêr a thuai (hlo tûr kah) mai kan ching hian chhiatna tam tak min thlen tawh a, min thlen mêk a, min la thlen zel dawn bawk a ni.
3. Farmer tam ber chuan thlai engemaw, hlawk tak chin kan tum a. Farm operation pawh kal-khat deuh hleka kalpui a, a tâwpa ruh tawk kan beisei fo thin. Hei vang hian chemical fertilizers leh pesticides kan hman tam phah a. Invênlâwkna lam ai chuan, thâwk lehkhata chinfel nghal duak kha kan rilru-ah a awm thin a. Hei vang hian mihring hriselna siam tha thei eitur kan thar mumal thei lo fo niin a lang. Kan eitur thar tam berte hi keimahni ang chiah, pawnlama îtawm viau, han belhchianin chhûng lama kawrawng, chaw tha pâi tam lo tak tak an ni furin a rinawm. Tin, a chinchhuaka thil zir turin kan teirei peih lo êm êm bawk. Entirnan - Pangangin kan thlai a eichhe fova. Pangang thlahtu lungphur phengphehhlep thang (bottle trap/light trap) lo kam lâwk a, pangang thlahtu lo manage ai chuan, kan thlaia pangang a rawn lan veleh a, insecticide-a kah thâwr kha mi tam tak hian kan thupui tlat thin. Hei hi a pawi êm êm. Mi tam tak phei chuan, kan thlaiah rannung hnawksak a lo lan veleh, kuta man theih reng pawh - engin nge ka kah ang - tia min rawn zawt kher thin an awm nual. KAH hi kan thupui laklawh tawh hlawm a ni mai thei e. Ram leh ram pawh silai leh indona hmanraw hrang hrangin an inkâp thin a. Chutih rual chuan, information pawimawh inrûkchhuahsak turin spy an intir thin, a tangkai êm êm. Kan thlai eichhetu rannung leh natna hrik chungchangah pawh, kâp tawrh lo deuh a, khang hrikho information pawimawh kha kan ngaihven thiam a tul hle, Mizoram leilungah tlo taka farming kalpui tur chuan. Chuvangin, farmer thawhhlâwk leh tangkai ni tur chuan, chemtum hûm ngawt piah lamah pawh taihmâk kan chhuah lehzual a ngai tel tlat thin e.