Manchester City manager Pep Guardiola chuan Manchester City chauh lo chu club dang enkawl a tum tawh loh thu a sawi. Guardiola club enkawl hnuhnung ber tur chu City a ni a, manager ropui hian National team a enkawl chhunzawm ngei a rinawm thung.
FC Barcelona leh Bayern Munich enkawl a, hming lo chher lian tawh Pep Guardiola hian English Premier League club lian Mnchester City chu kum 2026 atangin a enkawl tan a, City hi kum riat chuang a enkawl der tawh. City a enkawl chhungin trophy lian 15 lai a lakpui tawh a. City hi EPL-ah a zawna vawi li champion zawn thei hmasa ber a nihpui bawk.
A bul tanna FC Barcelona leh a club enkawl pahnihna Bayern Munich te pahnih a enkawl aia rei City hi a enkawl tawh a. Club dang pan a, chher lian leh tur chuan a zuam tawh lova, City bak club dang enkawl a tum tawh lo tih Youtuber Dani Garcia bulah a sawi. Pep hian, “Ka hma lam hun tur thui tak ka sawi thei lova, Mah se ka tih loh tur chu Manchester City chhuahsan a club dang enkawl a ni. England-ah a ni emaw, ram dangah a ni emaw City-a ka tih ang ti turin ka inpeih tawh lova, ka tha pawh a thum zo thawkhat tawh. Club dang ka enkawl tawh dawn lova, ram team erawh chu ka enkawl mai thei. National team enkawl erawh chu thil dang daih a ni thung,” a ti.
Gareth Southgate-a’n England manager hna a bansan khan Manchester hlawhtlingpuitu Pep Guardiola hi Three Lions manager thar ni turin rin a kai hle. England team enkawl theihna hun remchang nei bawk mah se kum 2027 thleng City enkawl turin contract thar a ziak ta zawk. Tum anga a awm theih chuan kum 2027 thleng City a enkawl ang a. Chumi hnuah chuan club dang enkawl lova awm in, ram team a enkawl zui tura ngaih a ni. Ram hrang hrangin Pep Guardiola hi an manager thar atan an duh hle ngei dawn a, a duh a nih phawt chuan team enkawl tur a haihchham lo viau tura ngaih a ni.
Club dang enkawl tawh lo tur Guardiola
