Kolkata-a Mizoram House hralh chungchanga chief minister hlui Zoramthanga fapa inhnamhnawih nia puh a nihnaah a bul tumtua ngaihte chu hriat theih ni tawh mah se, man an la awm lo.
Kolkata Ballygunge-a Mizoram House chu sawrkarin a hralh a, leitu pawh an hmu tawh. He thilah hian hetih hunlaia chief minister Zoramthanga fapa Ramthiansiama chu a hralh leh leina chungchangah inrawlh nia ngaih theihin social media lamah thehdarh a ni a. Kumin January 18 khan court (Aizawl District Court-a first class judicial magistrate) hnenah Ramthansiama hian dik lo taka puh a ni, tiin, criminal complaint a thehlut a ni.
Court hian Cyber Crime Police Station Aizawl hnenah chhuichiang turin a hriattir a. Cyber Crime chuan March 26 khan an chhuina ‘investigation report’ hi court-ah a thehlut a. Hemi chungchanga thu thehdarh (post) siamtu nia an rin ber chu Zosangzuala (Sena Zote) Phullen a ni tih an thlen.
Investigation report-a a lan dan chuan, Whatsapp thehdarhtute an chhui hmasak ber hi Zodinpuii, Chanmari niin, Facebook lamah ‘David Sailo’ tih account atangin a ni. Whatsapp-a thu thawntu (forwarder) mi engemawzat thu zawtfiahin, an statement lak a ni a. An thil chhui hmawrbawknaah hian ‘Phullen Politics’ tih WhatsApp group atanga lo chhuak nia hriat a ni. Thu post hmasa bertu nia hriat chu Zosangzuala, Phullen a ni.
Cyber Crime Police hian Zosangzuala hi he thila puh a nih thu hrilhhriat tuma vawi tam an beih hnu ah a nupui Laltharzeli kaltlangin an hriattir thei ta a. Zosangzuala hian a phone hi a tibo a, screen lock a neih loh avangin a phone chhartu tu emaw in hetiang hi an lo post ta nia a rin thu police-te hi a hrilh.
Police-te hian an hnena in-report turin kumin March 15 khan an ko a. Amaherawh chu Zosangzuala hian zunthlum nei leh thisen sang nei a nih avangin zin chhuah a harsat thu a hrilh. An ni hian a hriselna dinhmun that hunah an hnena in report turin an ti a. Tun thlengin a la inlan loa, ngaihchan mek niin, amah bakah Facebook-a hemi chungchang thehdarhtu pawh hi he case bikah chuan thu zawhfiah tura kawl an la ni loa, court thu pawh nghah mek a ni tih thu dawn a ni.
CM hlui fapa puhnaa bul tumtute la man lo
