CM hlui leh MLA nilai thaha
vautute court-in thiam chantir
Chief minister hlui Zoramthanga leh MLA Er H Lalzirliana te thaha vautu mi pahnih chu court-in hremna khawp tur an thiltihah finfiahna tha a hmuh loh avangin a chhuah zalen.
2022 March 11 khan Facebook group pakhat ‘Zoram Politics Group 1-ah ‘Thingtlang Pa’ inti chuan hetih hunlaia chief minister Zoramthanga hi thah tumna vauna thu lam a post a, police chuan sou moto-in Cyber Crime Police Station-ah FIR an ziaklut a ni.
Police-in an chhuizuinaah he facebook account a siamna phone number/ sim card chhui thlengin Rodinliana (37) @ Apuia Tochhawng, Khawzawl Hermon Veng a ni tih hriatchhuah niin, man a ni.
Facebook messenger lama Rodinliana’n a biak thin ‘CC Azyu’ tih pawh chhui telin, ‘Ram Siamthatu Pawl’ an din chuan hetihlaia chief minister Zoramthanga bakah midang ram tana hnawksak an tihte chu dahthat an tum tih sawiin, ‘CC Azyu’ inti hian an dahthat tur list zingah MLA Er H Lalzirliana pawh a tel tih facebook kaltlang hian a sawi a. A ni pawh hi chhuichian a nih hnu ah Chanchinmawia (44) Lunglei Zohnuai chu man ve leh a ni.
Police-in an chhuichianna (chargsheet) hi court-a ngaihtuah turin an thehlut a, First Class Judicial Magistrate Aizawl District Court-ah an chungthu ngaihtuah niin, court hian police-ten an chhuina hi finfiahna a tha tawk lo tiin, thubuai an siamsakte hi hrem an nihna tur awm loah a ngai a, a chhuah zalen a ni.
CM hlui leh MLA nilai thahavautute court-in thiam chantir
