Greater Noida-a Commonwealth Weightlifting Championship 2023 buatsaiha 81 Kg Youth category-a gold medal latu Lalruatfela, Bungzung chu chief minister Zoramthanga chuan a pisaah lawmpuina a hlan.
Intihsiakna hautak tak maia hnehna chang thei Mizoramin kan nei chu lawmawm a tih thu chief minister hian hrilhin, a kalzelna turah duhsakna a hlan a. Ram tihmingthatu infiammi entawntlak nih tum turin a chah.
Tunhnaiah Mizo thalaiten infiamna huang hrang hrangah hlawhtlinna duhawm tak tak an chang zel chuan a rilru a tihlim hle tih sawiin, “Kan thalai infiammiten hmalam an pan zel tih hriat hi a nuam em em a ni,” a ti.
Lalruatfela hian kum 2019 khan Mizoram Weightlifting Academy zawmin Mizoram State Sports Council coach Zohmangaiha hnuaiah a inzir a, kumin April khan National Centre of Excellence, Patiala Punjab-ah training tura thlan a ni. Kumin July 12-16 chhunga Commonwealth Championship buatsaihah 81kg Youth category-ah hian Snatch 1st attempt-ah 121 kg zoin, 2nd attempt-ah 125 kg a zo leh a; 3rd attempt-ah 128 kg a zo a ni.
Clean and Jerk-ah 1st attempt 148 kg zoin, 2nd attempt-ah 155 kg a zo loa, 3rd attempt-ah 155 kg tho hi zoin total-ah 280 kg a chawi a, gold a la a ni.
CM-in rit chawi chak lawmpui
