2023 December 28 atanga 2024 January 7 inkara Itanagar Arunachal Pradesh-a neih zawh tak Indian Weightlifting Federation, Youth, Junior leh Senior National Weightlifting Championships-a a vawihnihna atana Senior National Weightlifting Championship mipa huanga ‘Best Lifter’ a thlan Jeremy Lalrinnunga chu Ningani khan chief minister Lalduhoma’n a bangla-ah lawmpuina thingpui a inpui a. I&PR minister Dr Vanlalthlana’n a tawiawm.
Indian Weightlifting Federation (IWLF) Youth, Junior leh Senior National Weightlifting Championships khelh zawh takah khan Jeremy Lalrinnunga hi a vawihnihna’n Senior National Weightlifting Championship mipa bikah best lifter a ni a, kum 2020 khan West Bengal khawpui Kolkata-a Senior National-ah tho best lifter atan thlan a lo ni tawh bawk.
Itanagar-a a hlawhtlinna chan leh hi Senior National Weightlifting Championships-a gold medal vawithum a lakna a ni.
Social media lamah chief minister Lalduhoma chuan Mizo thalai, la naupang tak, infiamna lama khawvel hmelhriat kan nei chu lawmawm a tih thu a sawi a. Mizoram leh India tihmingthatu nia bei chhunzawm zel turin a ngen tih a sawi.
Tarlan tak angin, Jeremy Lalrinnunga hian Kolkata-a Senior National Weightlifting Championship 2020-ah khan kg 67 huangah gold la in, Punjab 2021-ah gold a la leh a, Itanagar-a khelh zawh takah kg.67 huangah bawk a lungthu kimna’n senior national gold a la.
Arunachal-a national championships-ah hian Mizoramin senior gold pakhat bakah youth-ah silver medal pakhat an la a; Services hminga chhuak Lalhunthara chuan kg 67 huangah bronze medal a awrh ve bawk.
Itanagar-a national weightlifting championship youth kaltlang hian January 19-31 chhunga Tamil Nadu khawpui Chennai-a khelh tur Khelo India Youth Games hmachhawn turin Mizo player panga – Isak Malsawmtluanga (61 kg), Lalruatfela (81 kg), David Lalzawmdika (96 kg), David Zohmingmawia (+102 kg) leh Cindy Lalparmawii (76 kg) an tling a ni.
Arunachal-a National Weightlifting Championship-ah hian Mizoram atangin player 15 leh official pathum an kal a; official-te hi- coach K Lalrammawia (Ramhlun South), assistant coach PC Remlalliani (Lunglei) leh manager Lalchhandami (Hlimen) an ni.
CM-in ritchawi chak lawmpui
