RTI chhanna aia rin zawk a neih thu lam hawia chief minister thusawi chu sawrkar hnathawkte tih mualphona leh rintawk lohna a ni tih Congress Thalai chuan an sawi.
Congress Thalai Hqrs. thuchhuak chuan, Assembly Session neih mekah chief minister Pu Lalduhoma chuan ZPM sawrkar hma kum tam tak officer hna lo chelh tawhte leh tuna department tina SPIO-te ring tawk lo anga ngaih theih turin thu a sawi tih a sawi a. ZPM sawrkara minister ni tharte a ring zawk chu mak an tiin an hrethiam lo hle a; sawrkar hnathawkte tih mualphona leh ZPM sawrkarin a hnuaia hnathawkte a rin tawk loh zia a langchiangah an ngai tih a sawi.
‘RTI zawhna an chhanna inang loah pawh ZPM party mualphona tur a nih dawn ai chuan an minister-ten an enpui hnuah an duh angin an tidanglam zel dawn tihna a ni a. RTI zawhna chhanna a him ta loah kan ngai a, pawi hle a ni,’ thuchhuah chuan a ti.
Sawrkar department SPIO-te dikna hailan a nih a, RTI zawhna dik taka chhan a nih theihna turin ZPM minister-te lo inrawlh ve lo turin Congress Thalai chuan ZPM sawrkar a phut tih a sawi a. Right to Information Act-in a sawi ang ngeia dik leh fel taka a hunah zawhna chhang tura inbuatsaih turin sawrkar a ngen tih a sawi bawk.
CM-in RTI aia rin zawk a neih hi sawrkar hnathawk rin lohna
