CM Rubber Mission hnuaiah
rubber kung nuai 51 chin tum
Chief Minister Rubber Mission hnuaiah ram hectare 11500-a zauah rubber kung nuai 51 chuang phun thar an tum tih chief minister Lalduhoma chuan a sawi.
Mamit district Hmunpui khawtlang chuan an khaw kawngpui black top thar, an khaw Health Sub Centre building leh quarters sak thar, CM Rubber Mission thawh hnihna atanga an khuain rubber hectare 25 chinna an hmuh chu Thawhlehni khan an lawm a. An sawm anga hmanpuitu chief minister hian, Hmunpui khaw kawng hi PMGSY hmanga cell filled concrete-a siam a lo ni tawh a, a lo chhiat tak avangin sawrkarin SASCI 2025- 2026 Part 1 atangin cheng vaibelchhe thum sengin an siamtha tih a sawi.
Chief minister a nih tirhin, Rubber Board of India chairman Dr Shawar Dhanania chuan a rawn hmu a. Tripura state-in Chief Minister Rubber Mission tha taka an kalpui anga Mizorama kalpui ve tha a tih thu a rawn thlen tih a sawi.
“Rubber chin theihna ram kan nei tha a, rubber hi kum 40 thleng a hnai theih a, a hnai tlak tawh loh hnuah thingzaia hman zui leh theih a ni. Ramngaw a siam a, tuihna a tipung a, a hralhna a tha bawk si. Tripura lamah a zirchiang turin official team kan tir thla a. An report kan ngaithla a, kan kalpui ve ta a ni. CM Rubber Mission hmang hian ram hectare 11500-a zauah rubber kung nuai 51 chuang phun thar kan tum,” a ti.
Sawrkarin rubber chingtu tur a thlan (progress partner) hi a tirah hectare khat theuh pe phawtin, a tul anga zauh zel theih turin hma lo la se an duh tih a sawi a. First phase-ah rubber that duh zualna – Mamit leh Kolasib district-ah hectare 1000-a zauah bul an tan a. Second phase-ah district 8-ah hectare 2575 a zauah an kalpui leh a a. Hmunpui pawhin hectare 25 an chang tih a sawi a ni.
Mamit bialtu MLA Er H Lalzirliana pawhin hmanpuiin, chief minister-in Hmunpui a tlawhnaa tawiawm turin a sawm avangin a lawm hle tih a sawi a a. A kaihhruai sawrkar hnuaia hun reilote chhunga hmasawnna duhawm tak tak Hmunpuiin a hmuh avang pawhin lawmthu a sawi tih a sawi a ni.
CM Rubber Mission hnuaiah rubber kung nuai 51 chin tum
