CM Special Package atan sawrkarin sum pek tur nei lo
– Dr R Lalthangliana
ZPM sawrkarin Chief Minister Special Package atan sum pek tur a nei loa, inghahna tlak a ni lo tih MNF hruaitu Dr R Lalthangliana chuan a sawi.
LADC inthlan campaign-a thang mek MNF senior vice president Dr R Lalthangliana, MLA chuan, ZPM-in Dampa bial by election leh LADC inthlana an campaign auhla leh mipui an vehthlemna ber Chief Minister Special Package cheng nuai khat pek tih leh, hand holding policy chu mipui tan innghahna tlak a ni lo tih a sawi.
“Kum hnih dawn ZPM sawrkarah hian Dampa bial Silsuri-ah pawh CM Special Package an tih hi mi pakhat chauh la pek a ni. Hemi atan hian sum pek tur sawrkarin a nei loa, inghahna tlak a ni lo. Thil tih theih loh tawp tur an sawi mai mai a ni,” a ti.
Hand Holding Scheme-a loan an aupui pawh mirethei zawkte dawmkanna tur lam aiin an phurrit chang mai thei, rulh leh ngei ngei ngai, pawisa pung tam tak nena leiba insiamna a ni thei tih Dampa bialtu MLA hian a sawi a. Mihring sing chuangin he loan hi an dil tawh laiin, bank chuan mi 200 chuang awrh chauh an la pe thei a, ZPM sawrkarin a thlanchhuah mi 700 chuang atangin mi 100 chuang chu bank hrang hrangin an lo hnawl tawh bawk tih a sawi
“Sawrkarin a nawrna avangin bank institution tlem zawkin loan hi an pe hram hram a, loan thami anga an zawrh mek hi mipui vehthlemna hmanrua mai, rulh theih loh chuan phurrit nasa tak, jail bang zut theih hialna pawh thleng thei a ni,” a ti.
CM Special Package atan sawrkarin sum pek tur nei lo – Dr R Lalthangliana
