CMA Awards nominations-ah Ella Langley, Megan Moroney leh Lainey Wilson an langsar

CMA Awards nominations-ah Ella Langley, Megan Moroney leh Lainey Wilson an langsar
59th annual Country Music Association (CMA) Awards nomination an puang a, Ella Langley, Megan Moroney leh Lainey Wilson ten nomination paruk theuh neiin an langsar ber a, Zach Top (5), Riley Green (4), Cody Johnson (4) bakah Kristian Bush, Carson Chamberlain, Luke Combs, Charlie Handsome, Chris Stapleton leh Morgan Wallen ten nomination pathum theuh an nei bawk.
CMA Awards-a award ngaihhlut ber entertainer of year-ah nikuma he award dawngtu Morgan Wallen a lang leh a, a title hum theihna chance a nei dawn a, chutihrualin he category-ah kum hnih kaltaa award lo dawng tawh Lainey Wilson bakah 2021 leh 2022-a he award dawngtu Luke Combs te pawh nomination-ah an lang a, country rimawi khawvela boruak rawn lian, he category-a tum kua nominate ni tawh chunga award la dawng lo Chris Stapleton leh he category nomination-a vawi khat lanna Cody Johnson te nen an awmo tlat mai a, award dawng tu tur rinlawk thiam pawh a harsa tlat.
Miranda Lambert-i’n female vocalist of the year-ah nomination a nei leh a, he category-ah hian tum 18 a lanna a ni ta a, he category-a nomination a lang ngun ber record siamtu Reba McEntire record a nihrual ta a ni.
Brooks & Dunn pawh vocal duo of the year-ah nominate an ni leh a, tun hi he category-a an lan vawi 26-na a ni tawh a, an record siam hi khum emaw nihrual emaw pawh a harsa tawh khawp ang.
Little Big Town chu a tum 20 nan vocal group of the year-ah nominate an ni a, he category-a nominte ni ngun ber record siamtu Alabama chu nomination pakhat chiahin an pha ta lo a, he category-a a tum 18 nana kumina an nominate leh Lady A chu he category-a lan ngunah pathumna an ni bawk.
Shaboozey leh Zach Top te chu new artist of the year-ah a tum hnih nan nominate an ni a, nikum khan nomination-ah lang ve vein, award erawh Megan Moroney-i’n a dawng a (Moroney pawh hian a tum hnihnaah award hi a dawng). CMA rules-ah chuan zaithiamten CMA Awards category dangah pawh an dawng miah lo a nih chuan new artist of the year-ah hian vawi hnih nominate an ni thei.
Kumin new artist hi Shaboozey hian a dawn a rinawm viau a, a dawng a nih chuan mihang zaithiam zinga CMA Awards-a new artist of the year dawng thei pathumna a ni dawn a, a hmain Darius Rucker (2009) leh Jimmie Allen (2021) ten an lo dawng tawh bawk.
Kumin new artist category-ah hian Langley, Tucker Wetmore leh Stephen Wilsonm Jr. te pawh nominate an ni a, ani hi country leh rock guitarist, songwriter leh vocalist a ni a, kum 46 mi ni tawhin, new artist category nomination a lang tawh zinga upa ber a la ni.
Steel guitarist Paul Franklin chu a tum 33 nan musician of the year category-ah nominate a ni a, hetiang zat hi nomination-ah lang tawh mah se award a la dawng miah lo!
Kumin hian CMA Awards nomination-a vawi khat lanna an awm nual a, Wetmore leh Wilson te bakah Johnny Clawson, Jon Decious, Jessie Jo Dillon, Josh Dorr, Alexandra Gavillet, Lalo Guzman, Jimmy Harnen, Brandon Lake, Micah Nichols, John Park, Raitiere, Matt Rovey, Kyle Sturrock leh Wales Toney te an ni.
CMA Awards-ah hian award dawngtu tur hi voting member 7,132 ten vote hmangin an thlang thin a, vote neite rimawi kawvela eizawng, zaithiam, hlaphuah thiam, producer leh musician te an ni. Award hi Bridgestone Arena, Nashville-ah November ni 19-a sem tur a ni.