Lalruatfela
I neih loh ît vangin i hmanhlel thin a,
I awhzawng âwk turin tawktarh
hreh i nei lo maw?
Chantâwk lungawi puitu te nun hi
a hahdam thlâk a,
Neihchhun hluttute hi a ni a tawpa mi awhawm ni leh thin te chu.
Kan tunlai khawvel tukverh tharah hian dah loh bîk thu awm hek suh, gen Z ho rual hian a lian a te, a laihâwl, a tar a zûr atanga puaklai thlengin kan hawi buk chhup hlawm mai a ni ang chu!
A then tlâng kan lâwna, a thenin lo kan zo va, a thenin chaw kan eikhawm a, a then kan lêng a. Chutiang ti ve thei lo in lama sekrek khawih atanga chuktuah huan siam te thleng hian social media sumtualah a lailum inchuhin kan insu her sawk sawk a, “zawngchhuak hmasa an tlai” tih ang hrimin chhuah hmasak inchuhin kan in sehmur tuau tuau a. Aizawl pawh A.I.zâwl a chang zo ta!
Kan rualpawl man te hi a va tô ta em? Tûnhmaa Thehlei ruala theirah tlâna inkawm mai mai thin kha tunah chuan Reels, Picnic, K.F.C, Bouquet, Karaoke, Spot tih angreng te’n min rûn a. Ram changkâng zawka chêng te ka entawn e kan tia, kartawp(weekend) kan hmang kârtluana, an thawhrimna erawh kan hrechang tawh lo. |halai kan pungkhawm luih luih a, hmun leh hmunah pawh online games lo chuan kan inkawmho thei meuh tawh lo, kan Mobile phone tel lo chuan kan inawitlei zo lo te pawh ti ila, tun min mawh lovang chu!
“Coat of many colors” hla sa chungin kawr man tam pui pui kan ngên a. Kan nu te kutchhuak kan sit lawi a. An thiamna kan zahpuia, an taihmakna kan tuipui lo va, rim taka thlantui bual huh hniang chunga an thlai thar ai chuan readymade hmawmsawm kan ngaisâng zawk a, chaw bâr lova khawilai Café emaw a dinner eichhuah te kan intihhmuh a, kan tlinin kan thei cher cher tawh teh e.
Dolly-i rilru zu tawmpui niawm fahranin, although we had no money, well I was rich as I could be… te kan han tithla ve rirawka, inrenchem kan tum lo va, kan chantâwk kan lungawipui der si lo. Kan awhzawng neihnan chuan tihhreh leh sûmkar pawh nei zo lovin kan tuak phu suau suau ta a nih si hi maw. Mi hlaphuah te hi kan chîk peih lo mang e.
Kan intichangkânga, kan khawsak kan tisânga, kan fingin rem kan hre narawh e. Nimahsela, kan Mizo zia, kan hnam ro te hlut a, chawikân nachang kan hre lo va, kan pi leh pu te laka kan thuam chhawm Tlawmngaihna, Huaisenna leh Aia Upa zahna te chuan kawngsir an chuh rawk rawk tawh a, kan orginal brand dikna te, induhsaktawnna te chu hlîp in, a aiah A.I edit 80’s thuam kan inbel ta dah a, ran a pui thihsan ang chauh kan ni ta.
Engkimah AI kan ruaia, thenkhat chuan Pathian aiin kan be pawh ngun zawk mai lo maw a tih theih. A thatna leh a awlsamna hmang thiam tan chuan a tangkai tih loh rual a ni lo. Kan chhawr tur pawh a ni rêng a. Mahse, a takin min pawlh tlêm tial tial a, filter phênah kan biru a, kan hmaikawr lem vuah mila kan hmai a than hunah kan la buai mai lo’ng maw? Mi dangte nuihzat leh ‘thing’ tih hlauh vang mai a kan “Originality” pensan ai chuan “coat of many colors” hla ang hian kan phâktawk kan inbel ve ngam ang em?
Country music fa chûam Dolly Parton a han boral meuh kha chu arbawm chhe kan tak meuhin kan kâng hluai a, uiawm kan ti hlawm hle a nih kha maw! A uiawm naah kan tawp mai dawn em ni? Ngaihven zui lovin kan arte thih tir mai ang maw? Ni lul lo e, dawvân-kai!
Pawlkut thla ni 19, 1946 kuma America chhimchhak Tennessee-a naupiang chhinchhiah tlâk Dolly-i hian, he leia a châm chhung khân hla 3,000 chuang a phuah hman niin an sawi a. Tin, a lei taksa vuiliam a nih hnu September 9, 2026 ah pawh a “Posthumous song” a “thih hnu hla” 2022-a an record “Bound to ride” chu an la release sak cheu nia. A hla phuah leh sak lâr hla tam zawk chu sawi kher ngai lovin kan hre bel awm e. American country singer, songwriter, actress a nih bakah mahni neih ui lo va midangte rawngbawlsaktu ‘Philanthropist’ ti a hriat lar a ni bawk.
Kum 1973-a a phuah, thlûk nalh leh thuril, “I will always love you” hian “Philanthropist” a nihna a nemnghet chiang hle. Nula leh tlangval inlêmna lam hla niin ka lo ngaia, a lo ni mang dêr lo! Thiangzai(duet) a sak pui thin, a mentor ni bawk Porter Wagoner-a tâna a hlaphuah a ni a, “The Porter Wagoner Show” chhuahsana, Malzai (Solo-artist) lama kal a rilrûk hnu ah, a thianpa chu a malmâk a ngai ta si a. Lungchhia leh lunghnuala awm mêk a thianpa rilru thawi dam nan,
If I should stay,
I would only be your way
a han ti te te a, a hla tawp lamah
chuan,
And I will always love you
I will always love you
I will always love you
I will always love you
a ti thla ta mawlh mawlh mai le. A hun lai khan status reshare te theih ve ta se, khi lai tlar khi a ziakral raih khawpa fiah loin an reshare chuai chuai ka ring! A zei tlat a! Wagoner-a tân hian a va mawihnai dawn kher em. Hei a liama hmangaihna nasa. Dolly-i hian a hma a sial lovin, midangte rilru hliama, an kawng dala awm mi a ni lo tih a lang chiang hle. Hei chang a ni lo, Joelene, 9 to 5 ah te pawh hian sawi châk leh sawi hual ka van ngah em! Ka lênin a khuh sêng lo-ah i ngai mai teh ang.
Dolly Parton chuan a chûnnu pachhiatna chu dichîm hauh lovin a hriatthiampuia, a nu’n hmangaihna nena a chilhkhawm “Kawrchung tialmawi” chu a Awrpuar fangra awrh tlat a.
Bible-a Jakob-a’n a fapa duatbîk Joseph-a hnena a kawrfual pêk ang kha a nih ngei beiseiin, vânneihna leh hlimna a ken tel ngei a ring tlat a. A ti sual lo!
Keini chu a sikul kâipui te anga hawihhai lo kha ni ve lovin, i beng ngawng nuih ve ngawt lo teh ang u khai!
But they didn’t understand it
And i tried to make them see
That one is only poor
Only if they choose to be
Chhân khân a hria in, retheihna a thlir dan te hi a va ropui tehlul em! Ni e, retheihna hi chuan nun a tihlim lovin a thlanawmloh ngawt mai. Kan rilruin retheihna a thlan tlat phei chuan kan va rethei zual dawn rua em! Nimahsela, chu retheihna chu Dolly-i hian a thlang ve awzawng lo, an neihloh aiin an neihchhun a chhiar zawk a, a chantawk khua in a rêl sakah chuan a lungawi hmiah!
A neihchhun a nu pawnchhe thuikhawm man tamzia chu a hre khiau va. A inbel meuh chuan mi hausate’n thil man to tak an neih a, an hlimna tluk thâwthânga hlim ve niin a inhria a, a zahpui nahek lo!
A tawp nan hei hi ka zawt leh a che, “Coat of many colors” hi i inbel ve ngam chiah em?