College zirlaite eizawnna lam sawipui
Govt Aizawl West College chuan an zirlaite tan eizawnna kawng dap kawnga inruahman dan leh eizawnna kawng dap kawngah kan zirlai kalphungin mawh a phurh dan mithiamte sawmin workshop an neihpui.
Hmanpuitu Mizoram Youth Commission chairman Malsawmzuala Ralte chuan university syllabus chu National Education Policy hnuaia duan vek a nih avangin kut themthiam, eizawnna atana tangkai tur syllabus-ah zeh tel a ni a. Chu chuan eizawnna tak tak hna dapnaah min pui thei dawn tih a sawi.
MYC-in Honda India Foundation leh Visan Foundation nen tanghoin Project Buniyaad Hospitality Management Training Course an nei mek a. Heta training chhuakte hi India ram hotel lianah an thawk nghal dawn tih MYC chairman hian a sawi. Tirupati lama thawk turin Mizo thalai za rual tirh chhuah an ni dawn a, bawhzui mek a ni tih a sawi bawk.
Health sector lam mai ni lo, hna dang tam tak thawh theihna turin Japan ram a inhawn avangin National Skill Development Corporation nen thawhdunna tur sawi tawh chu a hmuna en thlithlai turin an kal thuai dawn tih a sawi a. Mizoramah coaching centre – Aizawl, Lunglei, Saiha, Serchhip-ah neiin, Kolasib-ah hawn leh thuai tum a ni tih sawiin, hengah hian Group A leh B coaching neih a ni a, mi 500 chuang an kal tih a sawi a ni.
Mission UPSC (Taitesena) chu chak taka hma lak a ni a, rah tha a chhuah thuai beisei a ni tih Malsawmzuala Ralte hian a sawi a. Mandarin tawng zir turin Mizo thalai pahnih tirh an ni a. An zir zawh hunah Taiwan-a Mizo hnthawk duhte tawng an zirtir ve leh dawn tih a sawi. “Tawng a pawimawh avangin tawng zirna hmunpui – Centre of Excellence for Language Learning din tum a ni a. Human resource kan neih hi Mizoram rohlu a ni a, India ram hmun hrang hrang bakah khawchhak lam – Japan, Korea, China kan thalaiten an daidar dawn a. Chutiang tur chuan chak takin MYC-in hma a la mek a ni,” a ti.
Mizoram Education Reforms Committee working chairman Prof Lalbiakdiki Hnamte, Dr B Lalzarliana (MZU) leh Lailen Pvt. Ltd CEO Alan Lalhriatpuia eizawnna lama hriat tur pawimawh an hrilh a.
Hnathawh tur tangkai zirna kalpui dawn chuan a thu hla ringawt zirchhuak loin a tih a tih (experimental) a kalpui a tul thu, zirlai hriatchianna tur chuan mahni tawng ngeia zirchhuah a ngaih thu, khawtlangin kan thlirna tlang kan sawi danglam a ngaih thu leh marking system ringawtin a tak ramah thiamna tak tak min pek loh avangin a tiha tih a pawimawh thu te sawi a ni.
Khawvel danglam dan azirin hnathawh tur a danglam zel a, kan zirlai leh zirdan pawh inher rem zel a ngai tih sawi a ni bawk.
College zirlaite eizawnna lam sawipui
