College zirlaiten CM hnenah
FCAA pawm chhan zawtfiah
Aizawl City College Joint Students’ Union (ACCJSU) hruaitute chuan Thawhlehni khan chief minister Lalduhoma an hmu a. Zirlaite scholarship la sem theih loh leh Forest Conservation Amendment Act pawm taka dodalna awm chungchang an zawtfiah.
Chief minister chuan scholarship chu sem a nih thuai theihnan hma an la mek tih a sawi a. SNA SPARSH vanga budget sanction theih loh pawh central-in one time exemption a pe phal tawh a. Central ngen angin DO letter thawn thlak nghal a nih tur thu a sawi a ni.
FCAA chungchangah Article 371G rahbehna anga sawi awm chu thudik lo a ni tih a sawi a. Article 371G hi a duangtu zingah a tel avangin a hrechiang niin a lo hrilh. Sawrkarin a ngaihtuah ber chu mihring hmasawnna a ni a. Ramngaw leh ramsa nei teuh mah ila, ram mipui himna a derthawn a, kan dinhmun a that si loh chuan awmzia a awm lo tih a sawi. Ram leh hnam hmasawnna atan FCAA an pass chu a tha zawk tih ACCJSU hruaitute hi a lo chhang a ni.
ACCJSU hruaitute chuan CM-in tha taka a lo dawnsawnnaah lawmthu an sawi a. Scholarship chungchang bikah a rang thei ang bera zirlaiten an dawn theihnan theihtawpa hma lakpui a, vilzui pui reng turin CM hi an ngen tih a sawi a ni.
College zirlaiten CM hnenah FCAA pawm chhan zawtfiah
