Hel pawlin Colombia-a Catatumbo region an beihnaa thi chu mi 60 an tling ta tih an ram human rights office chuan a puang.
Venezuela ramri bul lawka awm region hi hun rei tak atang tawhin cocaine-a sumdawnna hmun inchuhin pawl inhal tak takte an lo indo tawhna hmun a ni.
Ombudsman’s Office chuan tuna inbeihna thleng mek hi Colombia-a ralthuam keng pawl lian ber ni mek, National Liberation Army (ELN) leh kum 2016-a sorkar nena inremna siam, Revolutionary Armed Forces of Colombia (Farc) te an inbeihna a ni.
Sorkarin inremna an neih theih nan hma a la a, derthawng taka inremna an siam chu bawhchhiain an inbei leh ta a ni.
Sorkar agency pakhat, mihring himna leh dikna chanvo humhalhnaa beitu, Ombudsman’s Office chuan a hmain tharum thawhna thlengah hian mi 40 an thih thu a lo puang hmasa tawh.
Mipui, khawthlang hruaitu leh an chhungte chu ELN-in an thah emaw, an ruk bo emaw theih mai dinhmunah an ding niin an sawi a. Tun hnaiah mi 20 ruk bo an ni tawh a, an zinga a zahve chu hmeichhia an ni tih an sawi bawk.
Office hian thah tawh zingah hian inremna an lo siam tawha hming ziak ve mi pasarih bakah mihring dikna chanvo humhalhnaa thawh hlawk tak, Association for Peasant Unity in Catatumbo (Asuncat) hruaitu, Carmelo Guerrero pawh a tel tih an sawi.
Asuncat hian Zirtawpni khan an board of member zinga mi pahnih, Roger Quintero leh Freiman Velasquez te pawh a hma ni atangin an chin an hriat loh thu social media-ah an tar lang a, helho hian an ru bo a nih an ring.
“Hmun thenkhatah chuan ei leh in tur a vâng tan a, hei hi mi chengten an tuar tan mek,” tiin Ombudsman’s Office chuan Inrinni khan thuchhuah an siamah an tar lang a. Tharum thawhna thleng avang hian mi sang chuang an tlanchhia niin an sawi bawk.
“Upa, naupang, thang lai, nau pai lai leh rualbanloten he thil thleng mek hi an tuar zual bik em em bawk,” an ti. “Catatumbo-ah hian thisen a luang leh mek a ni,” tiin Association of Mothers of Catatumbo for Peace chuan Zirtawpni khan an sawi bawk.
“Silaimu leng hi silai keng ve dang chauhvin an tuar lo va, kan khawtlangin thil tha kan lo suangtuah ve thin a tichhia a, chhungkua ti thenin kan fate mit hmuhah firfiakna lantir a ni,” an ti.
Ombudsman’s Office hian tuna buaina chhuak mekah hian a bultumtuah ELN chu an puh a. Sorkar nena inbiakna an kalpui mek pawh Catatumbo-a tharum thawhna thleng avang hian Zirtawpni lo awm tur thleng atan an chawlhsan rih dawn.
Kum 2022 atanga rorel tan, President Gustavo Petro chuan hel pawl inkara tharum thawhna thleng thin hi tihtawp a tum hle a, ELN chu ‘indonaa pawikhawihah’ puhin an pawl hian ‘muanna duhna lam an hawi lo’ niin a sawi bawk.
ELN pawhin Inrinni khan thuchhuah siamin Farc chuan civil mite an that zawk niin an sawi ve thung tih Reuters news agency chuan a tar lang a. Farc hian he puhna hi an la chhang lo.
Inrinni khan Colombian army chuan muanna a awm theih nana bei turin sipai an tirh luh belh tih an puang.
Colombian drug gang-te intibuai
