Kolasib district paltlanga four lane kawngpui laih tura compensation pekchhuah danah thil fel lo a awm nia sawi awm chungchanga MJA Kolasib District-in a enfiahna kalzelah Thawhlehni khan Anti Corruption Bureau (ACB) chuan Kolasib an tlawh a, MJA nen hian inkawmin statement an la.
MJA Kolasih hian compensation sem tawhnaah an thil hmuh leh hriat dan an hrilh a, hengte hi record nghal zel a ni. Kolasib MJA president Andrew Vanlalauva chuan an hmalakna chu midang tana harsatna siam tumna a ni lo tih sawiin, “Ccompensation chungchangah kan rilru a dik lo nasa tawh hle a, hetiang zela kan kal chuan nakinah harsatna lian tak kan nei thei. Kan hmalakna hian hun lokal zel turah compensation chungchanga mipui chu kan fimkhur theih nan nise tih hi kan duh ber a ni,” a ti.
ACB hotute pawhin compensation lak tawhna hmunah kawng laih a nihin, kawng chin bak mahni ram anga chhal zui mai an awm thin tih an sawi a. Tumahin an laksak zui thin loh avangin nei zui ta pawh an awm thin tih an sawi.
NHIDCL-in four lane kawngpui a laih turah hian package 3 leh 4 huamchhunga ram neitute hnenah zangnadawmna pek a ni tawh hetah hian thil fel lo tam tak a awm nia sawi a nih vangin MJA Kolasib District hian RTI hmangin zawhna a zawt a. Competant Authority of Land Aquisition (CALA) Kolasib chhan danin, package 3 huamchhung – Vairengte leh North Chhimluang inkarah zangnadawmna latu mi 248 awmin, package 4 huamchhung – North Chhimluang atanga Kolasib Gosen Veng inkarah mi 218 an awm. Award latute hi MJA chuan a zirchiang a, four lane kawngpuiin a paltlang tur hmun pawh 2023 June leh July khan tum hnih tlawhin khawtlang hruaitute leh compensation dawngtu mi thenkhatte an kawm a ni.
Heng atanga an thil hmuh leh an mi kawmte thusawi atang hian thil diklo a awm ngei nia hria in Kolasib MJA hian ACB hnenah complaint a thehlut a; ACB chuan complaint hi thutlingah ngaiin a bawhzui ta a ni.
Compensation lak dan ACB-in chhui
