Congress chuan Ningania Lok Sabha rorel inkhawmah adjournment motion pu lutin tun hnaia US atanga Indian 100 chuang thawn haw chungchang sawiho an phut.
“Indian 100 chuang, a tam ber Punjab, Haryana leh Gujarat-a mite chu United States sorkarin duhdah tak leh hrehawm takin an lo thawn haw a. Hmeichhia 25, naupang 12 leh mipa 79 an ni a. Sawi dan chuan thawn haw an nih dan hian mihring tih dan phung lo takin tih an ni a, hei hi mihring dikna inzahsakna khawih thil a ni,” tiin motion pu luttu, Lok Sabha-a Congress deputy leader Gaurav Gogoi chuan a sawi.
“Rorelna in hian he thil hi sawihova nakin zelah, kan ram chhung leh pawnah pawh, kan mi Indian zawng zawngte chungah mihring inenkawl dan hmang lo taka thil tih a thlen tawh lohna tura kan tih a ngai a ni,” a ti bawk.
Nilaini chawhnu khan US C-17 sipai thlawhna chuan an rama dan lova Indian awm 104 a phurh chu Amritsar, Punjab-ah a tumpui a. Anni hi thla hmasaa lak luh Donald Trump-a sorkarin Indian a thawn haw hmasak ber an ni.
Thawn hawte hi Haryana leh Gujarat-a mi 33 ve ve, Punjab mi 30, Maharashtra leh Uttar Pradesh mi pathum ve ve leh Chandigarh mi pahnih niin PTI chuan a tar lang.
C-17 Globemaster hi Amritsar tumhmunah chawhnu dar 1:55-ah a tum a. Airport terminal building-ah sorkar agency hrang hrangten thu lo zawt fiahin dan bawhchhiat an nei em tih pawh lo endik an ni.
Zan dar 6:45 velah Punjab mite chu police lirtheiin an chenna in theuhvah phurh an ni a. Haryana mite pawh state police-in an khuaa dah turin an la bawk.
Cong-in Lok Sabha-a Indian thawn haw sawiho phut
