Congress-in bial tam zawk tifel tawh

Inthlanpui lo awm tura an party candidate tur
chungchangah Congress party-in bial tam zawk an tifel tawh a, thil hi danglam thei erawh a la ni. Ni hnih khat lek chhung pawhin thil a inthlak thei a, mahse a thuphungin bial tam zawk chu an tifel tawh tih thu dawn a ni.
Bial tam zawk an tihfel tawh lai hian harsatna an tawh theihna tur chiang sa bial pathum a awmah ngaih a ni: Champhai South, Mamit leh Dampa bialte.
Ningani khan Congress party Nomination Committee an thu a, a hmaa an lo thut tawhte nen, bial tam zawk chu an tifel. Amaherawhchu, Ningani thleng hian thil inthlak lian tak tak a la awm.
Nomination Committee thutkhawm hnuhnun ber thleng hian bial thenkhat chu an candidate tur pawh rinthu pawha sawi hleih theih loh khawp a la ni.
East Tuipui biala ding tur a la hriat loh a ni mai lo, tu hming nge ri tih pawh hriat a la har. Aizawl West II-a ding tur te, Aizawl West III leh Aizawl East I-a ding tur te pawh rin thiam a la har.
Ningani-a an thutkhawmah hian Aizawl West I-a ding tur chianga ngaih Dr Lallianchhunga chu Champhai South-a ding turin an ti nia hriat a ni a, hei hian ken tel a nei dawn. Aizawl West I-a ding tur ngaihtuah that a ngaih phah dawn tihna a ni a, Chalfilh biala ding tur chiang tawha ngaih Vanneihthanga Vanchhawng Aizawl West I-ah a insawn a ngaih phah thei nia ngaih a ni. A insawn a nih chuan Chalfilh biala ding tur ngaihtuah that a ngai leh dawn tihna a ni ang. Chumi letling zawng chuan thil a lo kal zawk nia ngaih a ni Chalfilh biala ding tur an awm avangin bial dang a nghawng zawk nia sawi a awm; Aizawl West I-a ding tur an sawn vang ni lovin. Thudawn pakhatah chuan Aizawl West I-a ding tur hian AMC corporator ni mek an hual tih a ni bawk.
Champhai South hi an party-in harsatna an tawh mekna a ni a, din tum mi pahnih awmna niin, din tum pahnih an awm avang hian minister hlui pakhat, he biala ding tura ngaih pawh a din ngam loh phahna nia hriat a ni.
Mamit bial pawh harsatna an neihna a ni a, he biala ding tur hi tihfel tawh ni mah se din tum mi dang awmna a ni.
Kumina Congress party buai intanna tia sawi theih, Dampa bial pawh harsatna thlen theihna hmun a ni. Kuminah Dampa-ah hian block an thiat titih a, Aizawl District Congress Committee president an thlak pawh Dampa bial buaina nghawng kal zel nia ngaih a ni. Chu mai a ni lo a, an party treasurer Zodintluanga Ralte banna leh minister hlui KS Thanga’n party a chhuahsan te pawh Dampa biala an party-in harsatna a tawh atanga intan tiin a sawi theih ang.
Dampa bialah hian ZPM atanga lut Lalhmingthanga a chiangah ngaih a ni a, he bial hi minister hlui pakhatin din a tumna, tun hnai lawk thleng pawha a tlawh thin bial a ni.
Bial tam zawk an tifel tawh na a, a vaia tihfel leh a puan chhuah lam an la hmanhmawh vak lo nia hriat a ni a, thudawnna pakhatah chuan September thla chhunga tihfel an rilruk tih a ni.