Mizoram Pradesh Congress Committee hruaitu thlan turah office bearers atana chuh tum mi pathum chuan Nilaini khan returning officer hnenah nomination paper an thehlut.
Thudawn danin, kumin February 20-a MPCC inthlan turah hian OB post pathum a awm a, ‘line up’ pahnih a awm dawn. Tuna nomination thehluttute hi line up khata awm an ni a, president-ah Zodintluanga Ralte, vice president C Ngunlianchunga, treasurer Lalrindika Ralte te an ni. Nomination la thehlut lo lam line up-ah president – Lal Thanzara, vice president Lalnunmawia Chuaungo, treasurer Dr Lalmalsawma Nghaka a ni.
Nomination an ‘file’ hnua thuthar thehdarhtute zawhna a chhannaah Zodintluanga Ralte chuan, party inthlan tur an hriatin a lo ni sa tawhten a hranpa in line up an siam a, office bearer thutkhawmah hei hi ‘official candidate’ an ti zui tih a sawi. An party inthlanah hian, All India Congress Committee ah pawh official candidate a awm hranpa ngai loa, a duhin an chuh mai thin nia sawiin, Committee-in a tul a tiha a pawm erawh chuan official candidate hi siam thin a ni chauh tih a sawi.
Congress party chu thingtlang lam thlenga an mi leh sa intih phur a, 2028 MLA inthlana sawrkar leh tura taima taka thawk a, an thiamna hmang turin OB candidate hi an chuh ve ta tih a sawi bawk.
An party chu unit level atanga state level bakah all India level thlengin, Committee thu leh duhdana kal thin an ni a, chutihlaiin tunhnaiah mimal duhdan a lal zawk ta fo a, party kalphung chhe zel tur vennan leh president kaihharh nan a ni pawh treasurer a nihna atangin a bang a, a banna lehkha a darh chiam erawh a thiam loh a ni a, an party mipui hnenah ngaihdam a dil tih a sawi a ni.
Congress inthlan turah nomination thehlut tan
