Inthlan a hnai telh telh a, political party-te’n theihtawp an chhuah mek. Bial hrang hrangah din tum leh ding tura ngaihte hming a ri a, Congress party pawhin candidate tur an tifel thuak tih thu dawn a ni.
August ni 17, Ningani khan Congress party nomination committee an \hu a, candidate tur engemaw zat an tifel nia hriat a ni. Thil erawh a la danglam thei.
An MLA-a zingah Zodintluanga Ralte, C Ngunlianchunga, Lalrindika Ralte leh Nihar Kanti Chakma te chu an bial ngaiah an ding dawn tih a chiang.
MLA ding laite bakah hian bial pangaah candidate tur an lo puang tawh a, Siaha-ah N Chakhai, South Tuipui-ah Laldintluanga, Lunglei West-ah PC Lalthanliana, Lunglei East-ah Joseph Lalhimpuia, Serchhip-ah R Vanlaltluanga te an puang tawh.
La puan lohah Aizawl North III-ah Lal Thanzara a chiang tawh a, tun hnaia an lawmluhte zingah Aizawl North I-ah Lalnunmawia Chuaungo, Chalfilh-ah Vanneihthanga Vanchhawng, Dampa-ah Lalhmingthanga, Aizawl North II-ah Lalrinmawia, Lunglei North-ah Eric Zomuanpuia te an chiangah ngaih a ni.
Minister hlui Lalawmpuii Chawngthu chu Kolasib lama kal tura ngaih a ni a, MLA hlui RL Pianmawia pawh a bial ngai Tuivawl biala ding tura ngaih a ni. MLA hlui Zothangliana pawh a bial ngai Lawngtlai East-a ding tura ngaih a ni.
An party president Lalsawta dinna tur a chiang lo a, ani hian din tumna emaw hauh emaw nei lovin, ‘Ka dinna tur chu party ngaihtuah tur alawm,’ a ti nia hriat a ni. Chutih rual chuan inthlan a hnai telh telh a, an president hi Aizawl South I-a ding tura rinna a lian telh telh.
An party thupuangtu Dr Lallianchhunga chu Aizawl West I-a ding tura ngaih a ni a, an treasurer Dr Lalmalsawma Nghaka chu Aizawl South II-ah a chiang tawhah ngaih a ni. Serlui bialah Angu Lalhmachhuana a chiangah ngaih a ni a, Lengteng bialah Lalhmingthanga Pachuau a chiangah ngaih a ni.
Ningani-a nomination committee \hu hian bial engemaw zat chu an tifel a, mahse thil a la danglam thei tih thu dawn a ni.
Congress party candidate tur chiang thuak
