Congress sawrkarna state-ah hmasawnna a tam – Rahul Gandhi

Bharat Jodo Yatra kalpui a, ramchhung hmun hrang hrang fangkualtu Rahul Gandhi chuan Congress sawrkarna state-ah hmasawnna a tam niin a sawi.India ram hmun hrang hrang kea km. 4000 chuang kal tawh Rahul Gandhi hian Thawhtanni khan Aizawl a thleng a, Chanmari kawn atanga Raj Bhavan thleng kea kalin, mipui thahnem takin tawiawmin an lo dawngsawng a ni.
MNF chuan central-ah BJP a thlawp tih sawiin, kum 5 sawrkarna an chan chhungin hmasawnna hna an thawh hmuh tur a vang a; sawrkarna an chan chhungin ruihhlo a hluar hle a, thalai 250 chuangin ruihhlo avangin nunna an chan phah tih a sawi. Kum 5 chhungin mi 2000 chiahin hna an hmuh avangin thalai hna hmu ve lote an beidawng hle, tiin, ruihhlo lam ah an tlan phah nasa hle tih a sawi.
Mizo hnam ziarang, hnam dan leh tawngte in beih a tawk mek a, Congress party-in sawrkarna a chan chuan Mizo hnam ziarang, hnam dan leh tawngte chu humhalh zel a tum tih a sawi. Mizo mipui chu an danglam tih sawiin, khawvel an thlir dan leh hmuh dan chu pawimawh a tih thu leh a ngaihsan thu a sawi a ni.
Manipur buaina chu hriatthiam har a tih thu Congress hruaitu hian sawiin, Prime minister chuan Manipur buaina aiin Israel buaina a buaipui zawk niin a sawi. Manipur chu state pahnih an nih tawh thu leh nunau pawh zuah loa inthahna a thlen mek laia Prime minister-in a ngaipawimawh lo leh tun thlenga a la tlawh lo chu hriatthiam har a tih thu a sawi bawk.
BJP sawrkar chu hnam tlem zawkte tan a him loa, tribal leh Dalit ten an hlauthawng mek tih sawiin, GST (Goods & Service Tax) chu sumdawng tenaute leh loneitute tan chhiatna leh harsatna a ni tih a sawi.
BJP thuneihna hman dan chu thil zahthlak tak a ni, tiin, Prime minister ngaihtuahna atthlak tak avanga pawisa tih thih a nih thu leh ram economy-in nasa taka a tawrh mek thu sawiin, BJP sawrkar hmalakna hrang hrang chu mipakhat hauhsakna tura duan a ni tih Rahul Gandhi hian a sawi a ni.
Congress party chuan sawrkar tha tak an din thin thu sawiin, an sawrkarna Karnataka state-ah mipui hamthatna tamtak an siam mek tih a sawi a. BJP sawrkarna state-ah LPG man Rs. 1000 chuang a nih laiin, Congress sawrkarna Rajasthan-ah Rs. 500 a ni a. Congress sawrkarna Chhatisgarh ah loneituten an buh chin atangin hlawkna tamtak an dawn bakah ramchhunga a thar hlawk ber an nih thu a sawi.