Congress tel loin LADC-ah sawrkar thar a piang dawn lo
– Lal Thanzara
Congress party tel lo chuan District Council-ah sawrkar thar a piang dawn loa, sawrkar intawm a lo piang ta a nih pawhin an thawhpui party-te lakah an rinawm dawn tih Congress president Lal Thanzara chuan a sawi.
Nilainia Lawngtlai district Vaseikai-a Lai District Congress Committee Conference a hmanpuinaah an party president chuan, LADC-ah party hrang hrang an sawrkar tawh a. Congress ni lo party dang an sawrkar apiangin thiltitheite induhsak tawnna ringawt a ni tih kan hre tawh tih a sawi.
District Council zahawmna pawh tih bawrhbanin a awm, tiin, “District Council-in zahawmna a neih let leh theihna turin Congress party kan sawrkar leh a ngai. Party mala sawrkar ngei kan inbeisei a, kan thei lo a nih pawhin Congress party tel lo chuan District Council-ah sawrkar thar a piang dawn lo. Sawrkar intawm alo piang ta a nih pawhin Congress chu kan thawhpui party-te lakah a rinawm dawn a. Sawrkar ngelnghet siam kan tum a ni,” a ti.
District Council-in ZPM sawrkar hnenah an mamawh an thlen a, engmah an tihsak thei loa, hmasawnna hna engmah kalpui theih a ni lo tih Lal Thanzara hian a sawi.
“Council sawrkar hnathawk hlawh pawh rei tak an ba a. ZPM sawrkar ang reng renga Council sawrkar hlamchhiahtu an la awm ngai lo. ZPM party worker tan pawh an harsatna phuhru turin sum leh pai an nei lo. Congress sawrkar laia in mamawh phuhruk a nih thin lai kha hre thar leh turin ka duh che u a ni,” a ti.
Congress tel loin LADC-ah sawrkar thar a piang dawn lo – Lal Thanzara
