Congress Thalai-in phut neiin Manipur CM lehkha an thawn

Congress Thalai-in phut neiin
Manipur CM lehkha an thawn
Mizorama Congress Thalai chuan Manipur chief minister chu tunhnaia Zohnahthlakte chunga Meitei firfiakte chetna chungchangah hma la a, nunna an laksak tak kalsan a fate zangnadawmna pe tura an phutna thu an thawn.\
Congress Thalai Hqrs. hruaitute hian Thawhtanni khan Mizoram larsap kaltlangin lehkha hi an thawn a. Manipur chief minister N Biren Singh hnena lehkhathawn hi Union Home minister leh Mizoram chief minister pawh a copy an pe a ni.
2024 November 7 zana firfiakten Manipur Jiribam district-a Ngurthansanga Hmar nupui Zosangkimi Hmar pawngsuala hal hlum zui chungchangah Manipur CM hi a ranglama hmala tura ngenna leh Zosangkimi pasal leh a fate pathum hnena zangnadawmna pe ngei tura phutna thu a ni. Larsap aiawh hian a private secretary chuan lehkha hi a lo dawng a ni.
Larsap office-a lehkha an pek hnu hian thuthar thehdarhtute hmaah Congress Thalai president Laltawnliana Sailo chuan Manipur buainaah Mizoram chief minister chu Union Home minister hriatpuina in remna palai hna thawk tura tih ni awma adviser to chief minister Pu Lalmuanpuia Punte-in a sawi laiin, Manipur CM hian hetianga ruat an awm loh thu sawiin, Mizoram CM hi na tak takin media kaltlangin a tawngkhum zui niin a sawi.
“Mizoram mipui thlan kan chief minister a chona hi Congress Thalai chuan a ngaizam mai mai dawn loa, na taka Manipur CM hi dolet turin Mizoram sawrkar leh mipui ka sawm a ni,” a ti.
Home minister Pu K Sapdanga’n 2023 November 2-a ZPM working president a nih laia thuthar thehdarhtute a kawm tumin, BJP Meitei ho sapatal vanga Zofa unaute tawrhna chu Mizoramah ZPM sawrkar a din hnu pawha NEDA hoin an la sawisa chhunzawm zel a nih chuan, ralkhat atanga kut kuangkuaha thlir ngawt an tlin ve pek loanga, a hen tawk tala unaute thlavang an hauh ve pawhin, dem an ni bik lo tura ngaih an nih thu a sawi chu Mizoram mipui leh Manipur-a Zofa unauten a tak taka hmuh an duh tawh tih a sawi bawk.