“Ka pu, kan thil leitute hi an lungawi loh
chuankan thlengtir thin!”
Lallunghnema
Charity Lodge
Cont: 9862288182
He Zoram zim têah hian mihring tlêm tê tak meuh kan cheng a; chutih lai karah kan han inlungrual lo mai mai khawp a. Inpumkhatna phei chu kan hlat tulh tulh em aw? tih tur a ni. Ram leh hnam naupang tak kan nih hi a hriat ngawih ngawih a, kan lei lungte hi a naupangin a no êm êm a. Lung chang tha hman tlâk a awm lova; kalkawnga lung phah tur chang tha tak a awm loh avangin PWD hotute chuan phai lam atangin lung chang an chah chhuak, an ti. Mizo mipuiin laiphir nên kan ram Zalenna an sual laiin America chuan Thlaah mihring an kâp chhuak thung a. Armstronga te chuan thla leilung an rap a ni. Kan inthlauh dan hi sawi thiam theih pawh a ni lo ve. America rama Consumer movement an kalpui mup mup laiin Mizoram chu ram thim a la ni a, Mizoramah Motor a la lut lo! Heng hun lai hian Consumer Right phei chu a rim a râ pawh kan la hre hek lo. Mahse, tunah khaw êng kan hmu tan! Consumer-te tân khua a vâr ve tan. Mêl tam erawh kan zawh a la ngai. Chuvangin Consumer te tân Mizoram hi ram thim a la ni fan!
Tun tum Consumer Huangah chuan February ni 27 – a Consumer Outreach Programme kan hman chungchâng report ang deuhvin ka ziak dawn a. In lo hlawkpui ngei ka beisei.
Tichuan, Consumer Outreach Programme hi Centre For Consumer Education Programme pakhat a niin thil thar ang reng tak a ni a. Ram dangah hetiang hi an hman âwm ka la hre lova. India ram pum huapah pawh hriat a la ni meuh lo âwm e. Keima irawm chhuak ve liau liau a ni a. Public Meeting hran huai hawt lova neih theih mai a ni a. Heti hian sawi dawn ta ila, dawr hrang hrang tlawhin kan va kal a lehkha kan sem a, kan pê a, kan hrilh a, kan zirtir a ni mai.
Kan beisei phâk bâkin Programme kan hmang tha a ni.
Tin, heti hi a ni a, New Market Office – a thawktute chuan dar 11 velah chuan New Market – a dawrkai, sumdawng eng emaw zat tr chu min lo koh khâwmsak a.New Market pisa puiah chuan kan inhmukhawm ta a. Keini Centre For Consumer Education lam atangin mi 6 vel kan kal thei a. Hetiang hian hun hman a ni :
(1) Chairman : Pu PC Lalhmangaiha, Checker, New Market Office.
(2) Thusawi : (1) Pu Lallunghnema,
Chairman, CFCE
(2) Pu C. Rohnuna,
Secretary, ,CFCE
Thu kan sawi hma hian inhmelhriattirna te neih a ni a. Keini Pu Hnuna nena thu kan sawi hnu hian zawhna leh chhanna hun hman zui nghal a ni a. CFCE-ina kan buatsaih, MIPUITE HNENA HRIATTIRNA LEH NGENNA tih chu sem chhuah a ni a. Sumdawng dawrkai ho an lo kal tha hle mai. Sawm nufa zat zet an tling ngei ang. Kan lawm hle a ni. Hun a chêp deuh avangin kan duhthusamin inkawmhona hun kan nei lo zawk a. A tlangpuiin kan thusawi an ngaithla tha hlein ka hria a.
New Market Office-a kan meeting zawh hian thawmhnaw leh bungraw chi hrang hrang zawrhna hmun kan tlawh nghal a. Police Out Post Office lam atangin Pu Chhandama’n kan kalna apiangah min ho thei bawk a. A thlamuanthlak hle. Heng dawr kan fannaah hian MRP, etc kan enfiah a ni ber. Nu pakhat chuan Sakawrbakcheh a zuar a, a lo tung far mai a. MRP pawh a inziak thlap a. MRP – 345 /- chu 335 /- vel a, a hralh thin thu min hrilh a. Dawrkai dangte pawhin MRP an ngaihpawimawh thu min hrilh bawk.
Nu pakhat chuan, thawmhnaw chhia an zawrh ngai loh thu leh an hralh ngai loh thu min hrilh a: “Ka pu, thawmhnaw chhia an lo lei a nih pawhin kan thlengtir zel thin. Thawmhnaw chhia kan hralh ngai lo,” a ti.
Hetiang hian nu pakhat ka zawt a:
Keimah : Mami, in thil hralh in thleng tir thin em?
Dawr nghaktu: Ka pu, kan thil hralh reng reng hi sawisel tur an neih chuan kan remti vek a. Thleng an duh pawhin kan thlengtir zel thin. Tu mah kan thleng tir phal lo ngai lo. Hei hi kan tih dan a ni.
Keimah : A va lawmawm ve. Hetiang tur hi a ni. Dawrkai thenkhat chuan,“A thleng theih loh”, an lo tiin anmahni thil leitute chu an lo vin khur khur thin a. Nang chu i entawntlak hle mai.
He nu nena kan inbiakna hi a tawi viau nain, ‘thuchah’, min pe a ni. Dawrkai tam takte tan entawntlak a ni. He nu fel tak hi ka ngaihtuah chhuak ta fo mai. Kristian nu a nih hi ka ti a. Ka la tlawh leh mawlh ang.
Consumer Outreach Programme hi kan dam a Pathianin rem a tih chuan kan la nei zel dawn a. Dawrkai leh Sumdawng tawiawmna pawh kan la mamawh hle zel dawn a ni.
Leitu awm lovin a hralh theih loh.
Dawrtu awm lovin dawr a hawn theih loh.
Passenger awm lo Bus chu a tlan thei lo.
Thlawhtheihna pawh a thlawk thei hek lo.
Consumerte zalenna apiangah
corruption a bo thin.
Hei hi lo hre rawh : I thil lei leh service i leina a harsatna i neih chuan he article ziaktu hi hrilh thin ang che.