San Mames khelmuala Spanish Copa del Rey quarter-final match-ah 2-4-a mualneitu Athletic Bilbao hneh loin Barcelona an tlawm a, champion thang dang Real Madrid an tlak tawh bawk avangin, ti hian, tunhnai kum 15 liamta chhung belhkhawma Copa del Rey trophy 10 la tling Catalan team leh Barnabeu club tel loin a vawikhatna’n tournament an khelh chhunzawm dawn ta a ni.
Nilaini zanah Gorka Guruzeta chuan an thah fel hlawt tihah mualneitu team hmahruaina goal khungin, darkar chanve khelh tlin dawn leh khelh pelh hnu lawka Robert Lewandowski leh Lamine Yamal-te goal hmangin Nou Camp club-in 2-1-in hma an hruailet a, chawlhlawk thlengin goal dang a luhbelh lo.
Second half tir lamah Oihan Sancet chuan home team siphurh sut ve lehin, hun pangngaiah goal dang a luhbelh lo a; extra time-a Inaki Williams leh a unaupa Nico Williams-te goal khat ve ve tihluh hmangin Bilbao an tlang ta zawk a ni.
Xavi team Barcelona khan inkhel thunun zawk mah se goal lamah Athletic Bilbao an hlauhawm zawk a, hun pumin goal-ah shot tum 27 zet an nei tling.
Barcelona rawlthar kum 16 mi Yamal kha he competition-a goal khung thei naupang ber a ni thar a; minute 32-a hmahruailetna goal a khung bakah hun tawp dawn tepin semi-final luhna goal ni thei tur chhuihlut turin hun remchang a hmu a, Bilbao keeper Julen Agirrezabala pela a chhuih chu goal-ah a lut ta lo hlauh a ni.
Nilaini zan inkhel dangah Mallorca pawhin 3-2-in an mikhual Girona an hneh ve bawk.
Copa del Rey a\angin Barca an tla
