Kum 29 mi Aaron Cortes chuan corruption thubuai 35-ah a inhnamhnawih tih a pawm a, International Tennis Integrity Agency (ITIA) lamin kum 15 chhunga tennis atanga an hnawhchhuah bakah £59,000 chawi turin an hrem.
Kum 2039 thleng tennis lama inhnamhnawih thei lo tura an phuar tak Spanish tennis player pawisa chawi tur zat hi a US dollar zawngin 75,000 a ni a, heti zatah hian USD 56,250 chu pek ngai rih lo tura tih (suspended) a ni.
Eiruk thubuaia a inhnamhnawih chhung hi kum 2016 atanga 2018 inkar kha niin, hremna tichhuaktu ITIA lam chuan khawvel huapa professional tennis humhimna atan thutlukna an siam tih sawiin, Cortes chuan ITIA investigation kalpui a nih laiin a thlawp tha a, hremna an pek pawh a pawm thlap niin an tarlang.
Spaniard Cortes hi a career-a a singles ranking sang ber chu world number 955 niin, ITIA hremna avang hian Association of Tennis Professionals, International Tennis Federation, Women’s Tennis Association leh national association zawng zawng buatsaih leh buaipui inelna reng rengah a chhuak thei dawn lo a, chhim ve ringawt pawh a tan a thiang lo a, he’ng pawl huaihawt coaching-ah pawh a inrawlh a rem dawn lo.
Corruption vanga hrem tuar Spanish tennis player
