Mizoram Public Works Department-a junior engineer C Lalfakawma chu a thuneihna leh mawhphurhna dinhmun hmangsual a, dan phal loha a duhsak zawngte sub-contract hna a thawh tir avangin court-in thiam loh a chantir.
PWD deputy secretary-in contractor pawisa dila puhna chungchangah Lok Ayukta-a complaint a thehlut bawhzuina kalzelah PWD Khawzawl Division-a JE a nih laiin C Lalfakawma hian Rabunga atanga Aiduzawl kawng laih leh enkawl zui hna thawktu
contractor hnathawhna cheng nuai 17 leh sub-contractor hnathawhna cheng nuai 3 chu dik lo taka pawhpen saka puh a ni a. Contractor Lalroenga hnenah hian Khawzawla a thlen in pa leh thianpa ni bawk Vanhmingthanga tan sub-contract hna dilpuiin leimin palh thei dawl nghehna (retaining wall) siam hna pathum a ruahman sak nia sawi a ni.
Aizawl District & Sessions Court (Prevention of Corruption Act) chuan hemi chungchang hi ngaihtuahin, thubuai ngaihtuah a nih lai hian C. Lalfakawma’n sum a lakna nia sawi Lalroenga leh Vanhmingthanga te hi sawrkar lam thuhretua an tannaah an inhnuhdawh avangin sum pawhpennaah hian finfiahna hmuh a ni loa, contractor nilo hnena contract hna pekchhawn leh thuneitu tling nilo JE-in a lo pawmsak satliah bakah a lo ruahman sak hi CPWD Manual 2014 hnuaia Clause 33 na kalh niin, hna viltu JE a nihna anga a thuneihna leh mawhphurhna dinhmun a hmangsual avang leh ami duhsak zawngte dan phal loha sub-contract hna a thawh tir avangin section 409 IPC leh Section 13 (2) of PC Act 1988 angin thiam loh chantir a ni thung.
Court hian hian vawiin – September 5 hian thiam loh chantir tak engineer laka hremna hi a tichhuak dawn a ni.
Court-in thiam loh chantir
