Covid laka Mizoram fihlim rih

Kum a lo thar a, Mizoramah Covid-19 hri vei an awm leh. Mahse thla a thar a, he hri lakah hian Mizoram a fihlim leh ta rih.
January ni 19-ah khan hri vei hriatchhuah thar pakhat a awm a, nikum October ni 19 hnua hri vei an awm leh hmasak ber a ni. January ni 24-ah hri vei hriatchhuah thar pakhat a awm leh.
Thla liam taah khan sample 17 endik a ni a, an zinga pahnihin hri an vei. Hri veite hi Aizawl district-a mi ve ve an ni a, pakhat chu a vawi hnih veina a ni. Vanneihthlak takin an la na lo ve ve tih thu dawn a ni. Pakhat hi January ni 30-ah a chhuak a, pakhat hi ni 31-ah a chhuak. Chumi hnu-ah chuan vanneihthlak takin hri vei hriatchhuah thar an awm rih lo.
February thlaah hri vei hriatchhuah thar an awm rih lo a ni mai lo a, sample endik tur pawh a awm meuh rih lo. Ni 4 thleng khan sample hi pahnih endik a ni tawh.
IDSP te’n an chhinchhiah danin, February ni 4 thleng khan Mizoramah sample 19,96,788 endik a ni tawh a, mi 2,39,564 te’n hri an vei tawh. Vanduaithlak takin mi 734-in hri hi an thihpui tawh.
Nikum kum laihawlah khan hri hi a hluar leh a, May-ah phei chuan hri vei zat hi 375 a tling. June-ah hri vei zat hi 116 a ni a, chumi hnuah chuan vanneihthlak takin hrileng hi a zia ta zel rih a ni.