India ramin pawikhawihna lama mipui dikna chanvo humhim that lehzualna atana dan thar pathum a hman tak chu pawikhawihtute chunga dan anga rorelna dik hlen thuai a nih theihna atan a hmang tangkai turten kan hriatchian a tul tih Home minister K Sapdanga chuan a sawi.
Mizoram sawrkar, Mizoram State Legal Services Authority leh Judicial Academy Assam tangho chuan India dan thar pathum (Naveen Nyaya Sanhita) – Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Adhiniyam zira intuaitharna Zirtawpni khan an buatsaih a. Hmanpuitu Home minister chuan, dan tharte chu dan hlui thlakthlengna satliah niloin, khawvel changkang chho zel mil tura duan a ni tih a sawi.
Organized crime leh tunlai technology hmanga thilsual tih a pun zel avangin, dan thar pathum chu mipui ngaipawimawh lehzual zawk (citizen-centric), rang zawka che chhuak thei, finfiahna chiang zawk nei tura science leh technology hman tangkai lehzualna atan leh tunlai khawtlang mamawh phuhrukna atan, ram chhung criminal justice system siamthatna tura duan a ni tih a sawi.
Chutihrualin a hlawhtlinna erawh mipui leh dan kengkawhtute bakah court rorelna lama thute thlengin Naveen Nyaya Sanhita an hriatthiam dan (interpretation) leh kenkawh a nih danah a innghat tih sawiin, a telten kan criminal justice system tihchakna kawngah thawhhlawk lehzual a, mipui chanvo leh dikna an humhalh theih zeln atan an hman a duhsak tih a sawi a ni.
Assam Judicial Service officer, Judicial Academy Assam zirtirtu pahnih – SP Moitra leh Bhupen Kumar Nath, Mizoram Police SP (Cyber Crime) Zonunsanga leh SP (Crime) Gaurav Tyagi ten dan thar pathum hi sawizauin a kenkawh chungchanga hriat tur an zirtir a. General Administration Department-a executive magistrates, Gauhati High Court Aizawl Bench-a judicial officers, National Informatics Centre officials, sawrkar advocate ho bakah Home, Health & Family Welfare leh Law & Judicialofficials an tel a ni.
Criminal justice system tihchakna atan dan thar pathum chian a tul – Home minister
