CSR Fund hmang theite kokhawm
Mizoram CSR Cell buatsaihin Thawhlehni khan MLA, deputy commissioners leh civil society organisation hrang hrang tan corporate social responsibility fund hmuh dan inhrilh a ni.
CSR Cell chairman, adviser to CM TBC Lalvenchhunga chuan Mizoramah CSR Fund hmang thei registered society leh foundation kan tlem avangin India rama CSR Fund hmang tlem ber state kan ni mek a, CSR fund hmang hian ram tan hmalakna tha leh lian tak tak kalpui theih a nih avangin a kalkawng hriat a ngai tih a sawi.
Chief Minister Office-a awm CSR Cell hi CSR diltu tura din niloin, CSR pe thei corporate leh a dil thei society leh agency inkara palai hna thawktu a ni dawn tih a sawi a. Mizorama fund dil thei leh fund pe thei inzawm tawnna tur (match making platform) an siam mek a, Delhi leh Bangalore-ah CSR chungchang ngaihvenin an zin a, Cell hian a hrana Trust neih hial an rilruk tih a sawi bawk.
Planning secretary Lalmalsawma Pachuau chuan CSR Cell nihphung leh hma a lak tawhna a sawi a. Kumin November 14-a Bangalore-a UNDP nen tangduna CSR pe thin company-te nen an thutkhawm bawhzui dan a sawi a ni. Mizorama CSR dil thei awm chia ngaihte nen an inhrilhfiah hnu ah, kum tharah corporate aiawhte leh tun tuma kalkhawmte tan inkawmho hun buatsaih an tum tih a sawi.
CSR hnukchhuak tawhte leh CSR lama thiambik ten an bawhzui dan an sawi a. A dil thei tura registration neih dan leh thil tul an sawi a, zawhna neiin an zawt a ni. Project ziah dan tur inkawhhmuhna format inpek a ni bawk.
CSR Fund hmang theite kokhawm
