CSS thawktuten nawrh titawp
Sawrkara thil phut neia tiamchin awm loa hna thawk loa nuar mek CSS hnuaia thawktute chu sawrkar aiawh nen an inbiak hnu ah hmalakna ngaichang rih turin nawrh an titawp tih an puang.
Zirtawpni zing khan DP&AR minister K Sapdanga leh All Mizoram CSS Employees Coordination Committee (AMCECC) hruaitute an inkawm a. Sawrkar laka lungawilohna an lantir chungchang leh an thil ngiat mek an sawiho.
Minister hian Government of Mizoram Regularisation of CSS Employee Scheme 2024 chungchang leh office memorandum check list thla khat chhunga siamthat sak a tiam a, an duh dan sawiho zel a remti bawk.
AMCECC hruaitute chuan ngaihtuah ve lehin, DP&AR minister ngenna zahawm an ti a. Sawrkar hmalakna hi ngaihchan nise, chutihrualin, sawrkarin show cause notice a chhuah tawh chu cancel nghal vek se, CSS employee-te laka hremna lek a tum mek chu sut nghal turin an phut tih an sawi a ni.
AMCECC chuan, tun dinhmunah chuan sawrkara lungawilohna an lantir mek hi sawrkar hmalakna ngaichang zel chung leh, CSS employees thlawptu mipui tawrhna a nasat tawh em avangin chawlh lailawk phawt nise an ti a. 2025 September 19 tlai dar 4.00 atang khan nawrh a titawp. An duh anga sawrkarin hma a la lo anih chuan an kalzel dan tur an rel leh dawn tih an sawi a ni.
CSS thawktuten nawrh titawp
