Cuttuck buainaah internet titawp, dawr suasam

Cuttuck buainaah internet titawp, dawr suasam
Odisha-a Cuttack-ah kum tam tak kal tawh atanga chi leh chi inkara innauna awm chu Pathianni khan tihchhiah niin buaina a chhuak a, hei hi ni hnih liam taa Durga Puja lim paih tur atanga intan a ni.
Intihbuaina hi Dargah Bazaar-a rimawi ring lutuk tihrik atanga intan a ni a, internet tihtawp, bandh leh politics hruaituten zaidawh tura an ngenna a hring.
Police leh hmututen an sawi dan chuan Inrinni zing dar 01:30 leh 02:00 inkar vela Kathajodi luia Durga lim paih turten Dargha Bazaar an kaltlang laiin tual chhung miten lo tidingin zan reia an rimawi tihrik ring lutuk an lo sawisel atangin buaina a chhuak.
An inhnial buai hnuah in chung atangin lung leh darthlalang umin an vawm a, kawng zawhten an vawm let ve a. Cuttack Deputy Commissioner of Police (DCP) Khilari Rishikesh Dnyandeo-a telin mi eng emaw zatin hliam an tuar.
Police-in tiang nen an thunun zui thei a. Mi paruk vel man an ni a, thuneituten CCTV, drone leh mobile phone-a thlalak leh video lak ennawnin mi dang pawh an chhui zui mek.
Police Commissioner S Dev Datt Singh chuan, “Mante hi lunga intawngnaa inhnamhnawih, CCTV footage atanga kan finfiah an ni a, kan man belh zel ang,” a ti.
Thuneitute chuan mi pakhat na deuh hlek awmin SCB Medical College & Hospital-ah dah a ni a, DCP erawh a tha tih an sawi.
Khawpui boruakin ngai a awh leh mek laiin Pathianni chawhnuah khan Vishwa Hindu Parishad (VHP)-in district thuneituten khuahkhirhna an kalpui zawm lova motorcycle rally an huaihawt atangin a intan leh.
Khawpui khawchhak tawp, Bidyadharpur atanga rally-a telten Dargah Bazaar an thlen hian buaina a chhuak zui leh ta a. Thuneituten CCTV camera tihchhiat a ni a, Gourishankar Park-a dawrte suasam niin thenkhat chu hal nia a lan thu an sawi.
Police chuan buaina hmehmiha mipui hnawh darh nan tharum pawh an hmang nual.
Tharum thawhna leh buaina chhuak avang hian Odisha sorkar chuan Cuttack Municipal Corporation, Cuttack Development Authority (CDA) leh a bul hnai, 42 Mauza huamin Pathianni zan dar 07:00 atanga Thawhtanni zan dar 07:00 thleng internet service an titawp nghal.
Thuneitute chuan thu dik lo leh social media-a mi chawk phur thei thil thehdarh a nih loh nan WhatsApp, Facebook, Instagram leh platform dangte chu hetih chhung hian dan vek a ni dawn tih an sawi.
Police-te chu Dargah Bazaar, Gourishankar Park leh Bidyadharpur-ah tam tak dah an ni a. Central Armed Police Forces (CAPF) mite pawh chah luh an ni bawk.
Home ministry changtu, Chief Minister Mohan Charan Majhi-a chuan buaina chhuak pawi a tih thu leh mipuite chu Cuttack-a kum za tam inunauna awm vawng nung turin a ngen.
Sorkarin thil awm dan ngun taka thlithlaiin pawi khawihte lakah na taka an chet tur thu a sawi a. Chief minister hian hliam tuarte chu a thlawna enkawl turin thu a pe bawk.
Chief minister hlui, BJD President Naveen Patnaik-a pawhin mipuite chu zaidawh taka awm turin a chah ve bawk.
VHP chuan Cuttuck-ah hian Thawhtanni khan darkar 12 awh bandh an huaihawi a, thuneitute chu muanawm taka milim paih an tum venghim zo lovah an puh a. DCP leh district collector chu sawn an phut.
Luia milim paih hi tharum thawhna a thlen zawhah police venhimna hnuaiah darkar thum chhung hman zui a ni a. Police chuan buaina awm lovin milim 120 paih a ni tih an sawi.