Cyclone Murasu vangin AP-ah mi pahnih thi

Bay of Bengal atanga thawk, severe cyclonic storm Murasu avangin Andhra Pradesh-ah mi pahnih an tyhi a, thlai chin, in leh power thil tam tak a tichhe bawk tih news agency Press Trust of India-in a tar lang.
Chawlhkar khat chhunga an state-a cyclone thawk pahnihna hi Thawhlehni khaw var khan khawmual kaiin district 15-ah thlai a tichhe nasa a. A bikin Krishna, Bapatla leh Nandyala ten an tuar na zual.
Khawmual a kai hma atangin ruah tam tak a thlen tawh a. Thing sang tel leh electric ban 2,750 vel a tlu a. Thuneitute chuan thla na tak leh ruah tam tak hian transmission line, substation leh power sem darhna te a tichhe nasa a, a bikin Prakasam leh Bapatla district-ah a chhe nasa zual tih an sawi.
Andhra Pradesh State Disaster Management Authority Managing Director Prakhar Jain-a chuan PTI hnenah mi pahnih thi an awm thu leh cyclone shelter-ah mi 12,230 an la awm thu a sawi.
An chhut thuak chinah cyclone avanga thil chhe hlut zawng hi Rs vaibelchhe 344 leh thlai chinna hmun hectare 52,459 niin Jain-a chuan a sawi a. Chenna in 312 chhia a awm a, sorkar chuan tuikhuah tenau 814 a thlithlai zinga 776 chu en uluk zual ngaiah a dah.
Prakasam district-ah sangha manna lawng tam tak a chhia a, kawngpuiah lirthei a tangkhar nasa hle bawk.
Rel 35 chuang zin tur thulhtir a ni a, 14 an kawng thlaksak niin an chhuah hun sawn pariat an awm a. Thlawhna thlawk tur tam tak thulh a ni bawk.
Fire department-in thing tlu leh hnawk thian turin 185 an tir chhuak a. National Disaster Response Force team 11 leh State Disaster Response Force team 13-ten chhawmdawl hna an thawk.
State sorkarin relief camp 171 siamin ei tur packet 14,810 an sem a. Nau pai 3,066 leh nau hring hlim 1,008-te awmna sawn a ni a. District 13-ah medical team 725 leh ambulance 362 inrintir a ni.
Murasu hian Andhra Pradesh chhim lam vaukam, Nellore leh Narasapur inkar, Ongole bulah zing dar 3.30 leh 5.30 inkarah khawmual a lut a, darkar khata km 120 thlenga chak thli a keng.
Severe cyclonic storm hi cyclonic storm-ah chang zuiin Thawhlehni zanlaiah kha chuan a chak lo tawh hle a, deep depression chauh a ni tawh a, ruah erawh Nilaini thleng khan Andhra Pradesh vaukam velah ruah a la tam hle.