Central YMA chuan tunhnaia state thenawm, Assam-a Bangladesh atanga dan loa awmte hnawh chhuah an nih avanga lo inven dan tur a ngaihtuah.
Assam atanga hnawh chhuahte, thenawm state-a an luh lohna turin hma an la mek hlawm tih Central YMA hian sawiin, ‘Kan state-ah pawh engemawzat rawn lut ve thei an nih avangin, lo inven dan turah sawrkarin ruahmanna a la siam lo a nih chuan, siam thuai tur leh inner line permit pek chhuah kawngah fimkhur lehzual turin kan ngen a ni,’ a ti.
State dang atanga dan loa lo lutte ven kawngah ramria awm Sub-Headquarters, Group leh Branch te pawh a tul anga hma la turin an inhriattir tih a sawi bawk.
PC party pawhin Assam-in an rama dan loa awm Bangladesh atanga lut te hnawt chhuaka hma a la meknaah Meghalaya, Nagaland leh Manipur sawrkar chuan an state-a an luh lohna tura inbuatsaihna an kalpui bakah an rama dan loa awmte laka hmalak dan an ngaihtuah mek lai hian, Mizoram sawrkar leh mipui pawh kan inralrin a, hma kan lak ve thuai a ngai tih a sawi a ni.