CYMA leh NHIDCL inkawm

Central YMA hruaitute chuan Mizorama inkalpawhna kawngpui siam hna thawktu NHIDCL hotute chu Ningani khan lengah sawmin an inkawm.
Mizoram hmun hrang hranga NHIDCL-in kawngpui an laih meka harsatna awm leh chinfel ngai nia lang, Sub- Hqrs YMA leh Group YMA atanga report an dawnte an sawipui a. Mizoramin kawngpui tha kan neih theihna tura theihtawp chhuah zel tur leh harsatna an neih chu Central YMA-a thlen thin turin an chah a ni.
NHIDCL executive director Virendra Jakhar chuan Central YMA chu harsatna an tawh apianga an tlanluhna thin a nih thu leh an hnathawh pawh a tul anga enho zel an duh thu a sawi a. Kawng laih meka harsatna awm leh compensation chungchanga harsatna awm chu an lo enfiah tur thu a sawi bawk.
Central YMA hruaitute chuan Vairengte leh Sairang inkar four lane kawng laih tura harsatna awmte enzui a, sawrkar hotute an lo sawipui tur thu an sawi a ni.