Damdawi in hnawm thehthang
leh sawngbawl dan tur sawiho
Bio medical waste thehthang leh sawngbawl dan chungchanga dan leh a kaihhnawih hriat tur tul chu Thawhlehni khan Aizawl Smart City Ltd huaihawtin inhrilh a ni.
Hmanpuitu State Advisory Committee on Bio-Medical Waste Management chairperson, Health & Family Welfare commissioner & secretary K Lalrinzuali chuan, Bio-Medical Waste Rules 2016-in a phut angin felfai taka kum khat chhung Aizawl Smart City Ltd hmalaknaa sak zawh tak – Common Bio Medical Waste Treatment Facility Tuirial Airfield kaltlanga bawlhhlawh sawngbawlna kan nei ta chu hmasawnna a ni tih a sawi a. Hemi chungchang zirho tur leh ngaihdan thawhkhawm tura a hmanghria kohkhawm an ni tih a sawi bawk.
“Healthcare facility neitute hi an pawimawh em em a, chutihrualin dan zawm a pawimawh a. Bio medical waste sawngbawlah pawh danin ti tura min phut chu zawm hram hram a ngai a ni,” a ti.
Aizawl khawpui chhunga damdawi in leh inentirna hrang hrang – clinic, sub-centre, ran damdawi in leh a dangtea bawlhhlawh sawngbawl mek dan leh hrisel zawka kalpui dan tur sawiho a ni a. Ram leilung vawngtha turin ‘Mission Life Pledge’ an chhamrual a ni.
Aizawl Common Bio Medical Waste Treatment Facility kal zel dan tur hi Aizawl Smart City Ltd deputy chief executive officer V Lalruatliana’n a sawifiah a. Damdawi in hnawm uluk taka sawngbawl a pawimawh zia, healthcare facility neitu an nih anga an bawlhhlawh a hmun taka thehthang chu an mawhphurhna a nih zia, Bio Medical Waste Rules 2016 zawm a pawimawh zia leh dan zawmlo laka thuneihna kenkawh theih awmte inzirtir a ni a. Hremna hi lung in tantir emaw sumfai cheng nuai khat chin chawitir emaw theih a ni a, nitin Rs. 5000-a pungin inhremna ‘fine’ pawh kenkawh theih a ni tih sawi a ni.
Damdawi in hnawm thehthang leh sawngbawl dan tur sawiho
