Damdawi lakluh 800 endiknaah quality tha tawk lo hmuchhuak

Damdawi lakluh 800 endiknaah
quality tha tawk lo hmuchhuak
Health department-a Food & Drugs Administration Wing (FDA) chuan Mizorama damdawi lakluhah quality tha tawk lo (not of standard quality) a awm tih an hmuchhuak.
FDA thuchhuak chuan, India rama damdawi siamtu company tha leh changtlung atang chauha damdawi lakluh a nih theihnan hma a la tih a sawi a. Damdawi siamtute tan dan zawm tur leh endik dan tur duan sa a awm vek chungin, company-te hian dan zawm tha tawk lo awm palh theih a ni tih a sawi.
India ramah damdawi lem (spurious drugs) hmuhchhuah awm thin chu a siam phalna licence pawh nei lo, a ruka siamte thil tih a ni thin tih sawiin, pawn lam lan danah damdawi tha pangngai ang mai an ni a, laboratory-a test loh chuan hmuhchhuah a har hle tih a sawi a ni.
Mizoramah damdawi quality test-na kan la neih loh avangin sawrkar damdawi dahkhawlna – Central Medical Store atanga thawndarh a nih hmain supplier-ten an dah hlimah sample lak nghal zel tura ruahman niin, Regional Drug Testing Laboratory Guwahati leh NABL Acredited Private Laboratoty EFRAC Kolkata-a thawn a. Result a thlen tlai thin avangin tum angin kal theih a ni loa, Mizoramah laboratory kan mamawh zia a lantir tih a sawi.
2024 October atangin Internal Performance Agreement – Mizoram Health Systems Strengthening Project (IPA-MHSSP) hnuaiah damdawi quality endik hi rin luh niin, a senso tumsak an ni a. Damdawi quality test zat a pun phah a, kum 2022- 2023 ah sample 106 leh 2023- 2024 chhungin 121 chauh test hman a nih laiin, IPA-MHSSP hnuaia hma lak hnu, October 2024 atanga September 2025 inkarah damdawi sample 800 test hman a ni ta tih a sawi a ni.
Laboratory test result atanga a lan danin, damdawi man tlawm (generic drugs) ho chu a man a tlawm vang ngawta hnualsuat tur a nih loh zia hmuh a ni tih FDA hian sawiin, damdawi man tlawm 100 test-ah quality tha lo 2 (2%)
hmuh a ni a, damdawi pangngai test 700 test-ah quality tha lo 21 (3%) hmuhchhuah a ni tih a sawi.
‘Damdawi sample 800 quality endikah hian a lem (spurious) hmuh a ni lo a. Not of standard quality, tia laboratory-in result a pek hi Drugs & Cosmetics Act 1940 and Rules 1945-in damdawi mal te te standard atana a bituk tling zo lo an ni a, ei atana tlak loh tihna a ni,’ FDA chuan a ti. Hriselna lama thawktute leh a hmangtu mipuiin damdawi ei turah kan fimkhur lehzual a pawimawh tih a sawi a ni.